NGURRIVUNG MANIFESTO 2017

Ngurrivung 'People's Manifesto' tlangzar a nih


 
Bethel (Manipur), Feb 9, 2017: Tipaimukh Constituency-a MLA candidate Tv. Ngurrivung a manifesto chu mipui hmu thei dingin tlangzar a lo ni tah.

Pastor Pienglawm in manifesto Pathien kuomah inhlanna a nei zovin tlangzarna a nei nghal a. Tv. Ngurrivung lu-ah kut innghat in malsawmna thucha an hlan sa.



Tv. Ngurrivung chun a manifesto hi "mipui manifesto (people's manifesto) a nih" ti'n a hril a. "Pathienin rem a ti a, manifesto hai bawzui thei dinga a mi hlangkai a ni chun, ringum takin biel mipui le ei hnam tadingin thei tawp suo in hma la pei ka tih," ti'n Tv. Ngurrivung chun a hril.

Tv. Ngurrivung hi Tipaimukh Constituency vel nga lai zet a lo sirsuok tah a nih. Harsatna le rinumna tam tak pal thlengin, ke a lawn tulna hai khawm a fe pei hlak a nih.

"Mipui haia inthokin beiseina insang tak ka nei a. Pathien hminga hmangaina vote mi pe dingin kaisan fiel takin ka fiel vawng cheu a nih," ti'n biel mipui hai thu an cha.

NGURRIVUNG MANIFESTO 2017

+++++++++++++++++++++++++++++
Released by: Ngurrivung Team 2017
+++++++++++++++++++++++++++++

Independent Candidate,
55-Tipaimukh (ST) A/C Constituency, Manipur.

Nu Hming: (L) Khawlpui
Pa Hming: (L) Ngurkhawsiem
Unau: Unau nuhmei pahni
Pieng ni: 10.4.1983
Piengna: Parbung
Education Qualification: M.A. (Political Science)

“HUNGRO INDINTHAR NAWK EI TIU”

-------------------------------------------------

Kum Khat Plan (One-Year Action Plan)

-------------------------------------------------

Roads & Transport 

1) Tuiruong-Tuivai in kara lawng/raft; Sumo le motorte phur kai theina siem. Tuivai leilak hi Mizoram PWD kuta a um a ni a, an rang thei anga bawl zo vat a ni theina dingin hma lak ning a tih.
2) Tipaimukh NH (Pherzawl-Ruonglevaisuo inkar) black top a ni ngei theina dingin sorkar, sorkar-private partnership le lampui dang dang dap ning a tih. Road um tasa hai siemṭhat le nawrthar ding.
3) Tipaimukh-Tuithaphai bus/sumo service; Papuihmun-Hmarkhawlien-Jiri bus/sumo service.

Tourism & Protection of cultural heritage

4) Pi le pu hai sulhnung nia hril Pastor Thangngur ṭawngṭaina puk, Lalruong lungkap, Lalruong taikuong, Lungthulien arlungkhuong, Senvon sikpui lung, Sartuinek vadung, Dawikungpu lung, Lalruong leilakdaw le a dang hai inhuon le humhal (protection of historical & cultural heritage). Expert committee indin ding.

News & Mobile Communication

5) Mobile tower Hmarbiel le Vangaitlang-ah phun ding.
6) Constituency website/newsletter. Darkar 24 sungin constituency website siem.

Housing & Home Loans

7) Sorkar thawktu hai tadingin housing loan awlsam taka an lak theina dingin hma lakpui ding. An posting-na hmun (Tipaimukh constituency) ngeia in an bawl ngai a tih.

Hriselna le Nuhmeihai (Healthcare & Women)
--
8) Thlatin free health checkup (Parbung, Patpuihmun le PHC hai-ah)
9) Thaw nghal ding: Naupai hai ṭhangpuina: Rs. 500 (one-time). Bawzui ding: National plan hnuoia model constituency a puong eini chun ṭhangpuina Rs. 5000 le Rs. 6000 inkar dawng thei ning a tih.

-------------------------------------------

Kum 5 Plan (5-Year Action Plan) 

-------------------------------------------

Housing & Pathien Biekna Hmun

10) BPL hai tadingin rangva bân 6 (phase-wise kum 5 sunga zo ngei ding).
11) Biel sunga Pathien biekna in hai po po rangva inchung a inkhum vawng ding. MLA hlaw bakah NGO le hmangaitu haia inthoka thangpuina fund hai hmang ning a tih.

Economy & Farmers

12) Weekly/Monthly market - villages/group market.
13) Sorkar a inthoka BLP family haiin an hmu dinghai (ration le thil dang dang) indik taka sem ding.
14) Lo nei hai hai tadingin farm loan buoipui ding.
15) Kut sinthaw hai tadingin health/life insurance.
16) Phaiphin le lung (sand/rock mining) policy siem. Ei mithiem le stakeholders hai rawn ning a tih.
17) Fak le dawn zawngna tieng hmasawn theina dingin farm loan le training bakah thlai thar - sum hnar ṭhatak hung ni thei ding hai ngaiven ning a ta; zawrna ding hai buoipui ning a tih.

Ei thawsuok/kutsuok (product) pakhat bek domestic/international market thawnsuok (export) ding. Hi le inzawma thaw ding hai:-

i) Plantation of commercial plants – Huonpui (Khawtlang le mimal hlawkpui ding)
ii) Collective animal husbandry – Ran Farm (Khawtlang le mimal hlawkpui ding)
iii) Promotion of handicrafts and cottage industries with SHGs
iv) Promotion of horticulture
v) Promotion of apiary (khuoi vai)
vi) Business/stakeholders for private/contract farming
vii) Tribal/tlangram market – Churachandpur/khawpui dang, a remchangna hmun haiah siem ding.

Inchukna (Education)

18) Government schools a naupang haiin an hmu le dawng ding hai indik taka peksuok. Hi le inzawm hin library puitling a um ngei theina dingin hma lak ning a tih.
19) Free laptop: Manipur Board a Class X toppers (nuhmei le pasal) pek ding; Special Prize: Class X 1st Division a pàsi hai.
20) Annual inter-school competition.

Inkhel (Sports)

21) Inkhelna – a bikin football - hai thei tawka promote ding. Khuotin-ah HYA/HSA/Club hai leh inthuruol a hma lak ding. Biel sunga inthokin state/national/Indian Super League level player nei tum in thang nasa taka lak ding. Hi le inzawm in kum tin khuo pakhatah football pathum le goal net 1 pei free a pek suok ning a tih.
22) Annual Inter-village/Club Football Tournament huoihawt ding.

Tar penson le ruolban lo hai thangpuina (Old Age Pension & Assistance for differently-abled)

23) i) Upahai hi ei ro an ni a, penson sum indik tak a pek. ii) Ruolbanlo hai tadinga sorkarin ṭhangpuina a pek hlak hai indik taka an hmu theina dinga ngaiven pek.

Power Generation

24) i) Small scale level a electric generate ding. Power generation ti hin Tipaimukh Dam tina a ni nawh. Vadungte hai hmang thangkai ding a nih. ii) Solar power hmang ṭangkai thei dingin hmalak ding.

Tuiṭha Dawn Ding (Safe Drinking Water)

25) Khuo tin ah ṭuiṭha dawn ding a umtheina dingin water supply ṭhatak siem ding.

Sin (Employment)

26) Nuhmei le puon ṭhui/khawng inhnik mi hai training pek ding
27) Sin nei lo thalai hai tadingin hotel le sector danga thawkna an hmu theina dingin training pek ding.

Sorkar Pisa/Sorkar Thawktu 

28) MLA ka tling chun constituency sungah khawsâng ka ta; mipui, kohran ṭhuoitu, hnam ṭhuoitu le ram le hnam hmangaihai ṭhangruolin sorkar thawktu haiin an sin indik tak a an thawtheina dingin hma lak ding. Lekha ringot-ah thil um a tam a, a tak ngeia inchangtir theitu chu mipui ei nih ti hrezing ei tiu.

PHERZAWL REVENUE DISTRICT

29) Manipur sorkarin Pherzawl Revenue District a siem hi "hmasawnna dinga lampui tam tak laia sirbi pakhat" a ni thu ka lo tarlang tah a. Revenue district nisienkhawm, a sunga cheng tam tak chun a parvul ei nghakhla hle a nih. In parvul tir theitu chu ei Pathien chauh a ni a; chu Pathien chun ringumna le indikna a ngiet si leiin district sunga ‘stakeholder’ hai po po in Krista chanchinṭha le inmil a hma ei lak tlang seng ngai a tih. Chun, Pherzawl district a ni angin district headquarters chu Pherzawl a ni ding a nih. Sub-Division danga unauhai leh lungruol taka kal ei pen theina dingin hnam ṭhuoitu, kohran ṭhuoitu le ram hmangaituhai leh inrawntuo pei kan tiem.

INTIEMNA

30) Point 29 hai bakah hin ei ramah thaw ding awm tam tak a um a; mithiem haiin study ṭha taka an thaw phawt naw chun ‘chu chu, kha kha, thàwng ka tih’ ti el thei an nawh. Nisienlakhawm, ram le hnam hmasawnna dinga ṭhiltha hai chu ei Lalpa Isu Krista hmingin huoisen takin bawzui pei kan tiem a nih.

Ka Hma Ka Siel Ngam Lul Nawh!

Ziektu ~ Ngurrivung, Published at Virthli

Ka vawikhat tleirawl suoka ngaizawng ka nei ve sun a nih. Hieng ang thil hang tawng ding hin ka lo inring ngai nawh a, ṭhena biethu ka hang dawng meu khan chu um ngaina ka hriet naw a ni deu takin ka hriet. Kha hunlai a ka hla dit em em chu Pu Joel-in a sak,

Ka hma ka siel ngam lul nawh aw di,
Ka hmangei em lei chein;
I lawmna ding a ni phawt chun,
Val dang mi pawmsan lem el rawh.


ti kha a nih. Mihriem hi chu mani hmasielnaa sip ei ni sih a. ‘Ka hma ka siel nawh’ ei ti khawmin, a ruk tein mani ṭanghma hi ei siel tho thovin ka hriet.


Chuleiin, Lalpa rawng ei bawlnaa hin iengtin am aw ei thaw - ei hma hi einin ei siel amanih annawleh Lalpan ei hma a siel? Ringtu tinin ei thaw dan, ei thaw hlak chu ṭawngṭaina hi a nih. ‘Lalpa, mi hmang rawh’ tiin ei ṭawngṭai hlak a. Ei ṭawngṭaina tu’n am a dawn a ti khawm ngaituo lovin, mani hmasielna leiin, Lalpa rawl khawm ngai lovin nang le kei hin hma ei lo lak el hlak a ni naw maw? Mihriem ngaidan chun Lalpa hi a muong taluo a, nang le kei ruok chun thaw vat vat a, zo vat hi ei nuom dan niín a’n lang si. Hienga ei inhmawnaa hin ‘Baal hmaa dingṭhaṭhuon ngai lo ka nun Krista’ ei ti lai zing hin, Baal hmaah ei kun a ni zing naw maw? Karmel tlanga inelna kha ei en chun Baal thiempu tam deu el hai khan anni ditthlangnain zingkara inthawkin zangtieng inhnu rak khawpin Baal pathien an ko va; sienkhawm dawnna reng reng a um nawh. Asanchu Baal pathien kha pathien tak tak a ni naw lei a nih.

Nang le keiin ‘Lalpa rawng ka bawl’ ei ti lai hin, Pathienin ei hma a mi siel pekna ni lova mani hmasielnaa rawng ei bawl chun Baal hmaa dingṭhaṭhuon ei ni zing naw maw? Lalpa chu ama hun ruotah inlarin sin a thaw chauh hlak si a. Zantieng nisa nemah, maicham hnuoi le a vela chun tui intling dup khawpa vawithum lai an buokkhum hnungah Lalpa a hung inlang chauh a ni kha. Unauhai, ‘Lalpa rawng ka bawl’ ei tinaa hin inenfie ei ṭul takzet naw maw? ‘Lalpa mi hmang rawh, i rawngbawl di’n’ ti’n hla ei sak a, nang le kei mani ei inen si naw chun Lalpa hmang tlak ei ni dim chu aw! Lalpa’n a hmang nuom chu mi inngaitlawmhai an ni sih a; ei thiemna, ei degree dang dang- B.D; M.Th; B.A; M.A; hai ei suong chun Lalpa’n mi hmang tak tak ngai naw nih. Lalpa rawl hre tak tak hai chun an tlin nawna thu bák hril ding an hriet ngai nawh. Lalpa chu mihriemhai hrietthiemna khel tieng a’n lang hlak chau sih a.

Sandamtu hung insiengna Mari khawm kha a thei tawp chun inbuotsai ve ngei a tih ti ring a um a nih. Sienkhawm a kuomah Lalpa vantirko a hung inlar meu khan chu iengtin am ni thei a ta, a ti vel el a ni kha. A hma sieltu Lalpa khan iengkim a hriet a, a muolphona dingin iengkhawm a thaw nawh a, a ma hma siel lovin muolpho theina chu ngainepin, “Lalpa, i thu ang peiin ka chungah tlung raw seh” tin a dawn a nih kha.
Nang le keikhawm Lalpa’n ei hma a mi sielpeknaa hin, innghat ngam ei tiu va, ‘Lalpa, i thu ang peiin ka chungah tlung raw se’ ti thei seng dingin Lalpa’n mi ṭhangpui seng raw seh.

Email: ngurrivung@gmail.com

MLA with Difference- Dr. L. Fimate

By ~ Ngurrivung
(Thlaṭauni 21, 2011)
 
Zântieng dar 5 vel a, Bhakshi Tournament le in zawmin vântlang inkhawm ko a nih a.  In kan bawl an, kan buoi bawk leiin, ‘Dr. L Fimate, khuollien a thuhril ka ngai thlak hman phawt leh …’ ti’n zân dar 7 velin ka va fe veh a.  Mak deu el chu zân dar 8 a’n ri vâng khawmin ṭanzai kan rel thei da’l chu! Hieng ang zinga ei khawsa chun ei ram- ei hnam hi iengtin am ngirsuok thei a ti aw ti’n ka ngaituo vawng vawng a.

Mipui chu hall sunga lut dinga ṭawngringna (louspeaker) hmanga nasataka kan inkokhawm hnung chun kan ṭan thei hram a. Kan khuollien, Pu Dr. L. Fimate chu, a fe khawmhai chun Tipaimukh biela MLA a’n candidate ding a nih ti chu kan hriet chieng sa vawng ni’n ka hriet.  Chuongchun, thilpekhai an inhlan zo chun thuhrilna hun, mipui cheng hmur hai lai chun a nei a, ram le hnam a’n vawi thu hai chun a mi hne hle’n ka hriet.  A thuhril laia mi, mi deng deu hlawktu pakhat chu, “MLA danglam bik rieu ni ka tum” a ti kha a nih.

MLA danglam bik rieu nei ding chun iengtin am a biel mipuihai hin ṭhang ei lak a? Annawleh, Dr. L. Fimate hin election campaign a ṭan tak tak hma khawm hin pawisa iengzat chie’m a sêng tah aw?  MLA ei lo nei tahai hi chu, an tlingna dingin pawisa tam tak tak an sêng a, an tling hnungin an sêng zat hruk bitna dingin thei tâwpin an ṭanghma an siel nawk hlak ti inla, kawng tam taka chun ti suol kher nawm ei  nih. Annawleh, ei MLA-hai hi ei intum el di’m a nih?

Teu lo ve, indiktak chun a thlangtu mipuihai hi ei thiemnaw lei a nih. Mipuihai hi MLA danglam bik rieu nei tlùk ei ni’m aw! MLA in-candidate haia inthawka ei thil beisei dan hi a’n dik naw hle’n ka hriet.  Mi tamtak chun MLA in-candidatehai hnung zui a, annia inthawkin pawisa sum tam tak, hlawkna hmu ei tum sih a.  An hung tling a, ‘MLA ka nih’ ti ni awmtakin, an meitehemhai hin thu neitu ni ei tum tlat hlak bawk. Iem a na ram le hnamin a mamaw ti khawn ngaituo hman lovin mani hlawkna ding ei ngaituo a. Contract sin ṭha naw tak takin ei thaw a, ei thlangtling MLA-hai hi a ninaw tieng ei ṭhuoi a, pawisa sum, duamnaah ei ṭhuoilut a ni takin ka hriet.

Tuta ṭuma MLA inthlanga hin chu mipui hin candidate-haia inthawkin sum le pâi beisei lovin, ei ram, ei hnam hmakhuo ngaituo leiin mani dit zawng vote ngam seng ei tiu.  Chun, MLA candidate-hai khawmin pawisa sum leia tling hi tum lovin, huoisen takin thudik ṭanin tling ngei tum in la.  Pawisa sum tamtak senga tlinghai chun an pawisa sum seng zat kha hmu let nawk a ngai hlak si leiin thamna lak hi thil chi te tea khawm a lo awl nawk hlak a nih. ‘Thamna chun mivar mit a suk del’ ti a ni sih a.  

Thamna, corruption, sin thaw ṭha lo, ti hai hi ei rama hin a hung  re theina dingin MLA candidate-hai hin vote an zawng lai hin, an tik suksie hle hai sien la, pawisa sem naw hai sien; cheng khat, cheng hni khawm hi a sikin sik fan nawr nawr el hai sien. Amiruokchu MLA an hung tling tik leh thlierbîk nei lovin a biek inhawi hai sien, in tin fangin an nuom leh pawisa khawm sem hai sien. Chu pha chun, ei ram hin nasa takin hma sawn a ta, inlungruol takin kal chawi thei tâng ei tih. MLA with difference neina ding chun a chunga ei tarlanghai khi thil pawimaw le ei zawm ngei ngei dinga ṭha ni’n ka hriet.

Chun, mipui khawmin ei thlang-tlinghai hi, maw inphurtir el lovin, ei ni’n ei suksuolnahai hi inenlêt ei mamaw hle bawk. Chun, MLA in-candidate-hai khawmin an tling pha huoi taka sin an thaw theina ding le a tlin le tlinghaiin sin an hmuna dingin mimal sin pek dingin intiem naw hai sien.  An thupui, an manifesto huoisen takin khekpui el hai sien. Hieng anga ei thaw chun MLA danglam bik rieu nei ngei ngei ei tih. MLA with difference neina dinga apawimaw tak nia ka hriet chu ‘Election with Difference’ a nih.  Chun, election with difference neina ding chun ‘Election with Truth (Christ)’ nei a ngai.

Ei ram, India hi mipuiin ṭhuoitu/hotu thlangna ram (democracy) a nih a, mipui hi a thuneitu tak ei nih.  Ei thu neina ei hmang dik naw leiin, ei ram ah fakrukn’n nasatakin bu a sep an ta hi. Chun, mi tamtakin politics khawm hi fakrukna amanih ei ti hiel el an tah. Ei Bible-in politics khel dan ding a mi’n chuktir ang hin, ei ram-ei hnam damna dingin politics khel ei tiu. Chun, tuta ei hmaa election hung um dinga hin, “Krista leh vote thlak ka tih” ti hi ei ram-ei hnam damna dinga ei thutlukna ni seng raw se!

Krista le chun i vote zawr naw ti nih a; Krista le chun MLA i thlangtling pa khan thamna la ngai naw nih a, indik lo takin a suoi kei ngai bawk naw nih.

Ram hmangai lekhathiem le rawnkai hai fielna

Pu Tv. Ngurrivung a inthoka ram hmangai lekhathiem le rawnkai hai fielna.

Tipaimukh Biel Fangnaa Thil Tuok Ṭhenkhat

By ~ Pu Tv. Ngurrivung 

December ni 17, 2016-a inthawk January ni 14, 2017 sung hi Tipaimukh biel fangna’n ka hmang a. Khawtin sir a ni bakah, Cachar tienga um -Khanthuom khuo ka sir sa bawk.

Hi tum hin intin deuthawah lutin, vote nei mimal tin kuomah Pathien hminga vote hnina lekha sem a nih. Tam tak chun hienga Pathien hminga vote inhni hi tha an tih a; vote mi pe ngei dingin an intiem tawl. Khawtin deuthawa hin kan tlungin-haiin kan suok dawk ding pha tawngtaina’n an mi’n thla hlak. Pathien mi vengna zarin hriselna tieng khawm insawiselna um lova ei hang inzin suok thei hi chu lawm a um tak zet, Lalpa’n ropuina chang raw seh!

Inzinnaa tha-le-zung, sum-le-paia mi thangpuituhai, mi thlatlam lova ka fena naa mi zuituhai le tlungin/riekna inhawi tak tak mi buotsaipektuhai chungah Pathien hmingin lawmthu ka hril takzet. Pathienin malsawmna tamtaka vurin thangpui pei raw sen cheu.
Parvachawm-ah Pu Tv. Ngurrivung in campaign a nei lai.
MLA contest tum ve meu chu, hmun thenkhata chun sum nei dingin an mi ring khawm a ni el thei- thil ieng amanih thawpek dinga phutna dam ka tuok chang a um. Thenkhat chun ka hmel an la hriet naw leiin ka hmai-san ngeiah, “Ngurrivung hi sum-le-pai sem ding khawm nei lo chun invak invak naw sien la” dam an mi lo ti chu tie!

A karchang chun intin luta hnina lekha kan sem lai dam hin, mani ka hei inen chieng phat ka’n zak ngawi ngawi chang a um hlak bawk a. Inring lawk hman rak lovin mitthli far a awl khawp el.  A mi fepuitu ruolhaiin hre pal an tih ti inlau a um thei kher el. Khuo pakhata chun zantieng bufak khawpin, ka hnawm suok naw sa’n ekinah ka lut a, ka mitthli ka zu huoi char char! Thil ramtin ka ngaituo lai chun Philistine-haiin Israel-hai Pathien bawm an lakpek lai a, Pathien bawm Israel ram tieng phur kirtu ding bawngpui pahni, an tehai nene ne lai hai chu in tieng an thlung pek a; tawlailirin Pathien Bawm chu an inkeitir kha ka hrietsuok a. Bawngpui pahni hai chu vawitieng amanih, changtieng amani khawm pet lovin an tehai ngai tak pumin lampui intluona inbu malam peiin Israel ram tieng chu an pan ta char char a ni kha.
Taithu khaw mi hai lai khawm thei ang angin campaign thaw a nih.
Harsatna ieng po khawm tlung sien, kei khawm hi Pathien zarin fe pei ding ka nih ti ka hriet thar nawk a. Hi zan hin, zanril lai ka thanghar chun, “Leilung hi Lalpa ta a na, a sunga um po pohai leh” ti thu hi ka lungrilah a hung lut a. Nisa lum le zan khaw dei karah, lam suk, lam tung hraw chang hin, iemani zawnga ka ngaituo chun, sawl ka’n ti vang vang hlak. Khawsung lut phat intinah lutin Pathien hminga vote hnina lekha sem a tul hlak bawk si. Iemani chang hin chu, ‘Lalpa kei ni lovin, mi dang tir el rawh’ ka ti nuom hiel hlak.

Amiruokchu ka hang ngaituo chieng phat hin chu sawl khawm kan ti phal nawh. Tirko Paula’n, “Krista hmangainaa inthawk chu tuin am mi the’ng a ta?” a ti le, Pathienin, “… ka thilthawtheina hi hratnawnaah isawnnaw sukfamkima a um ... chuongchun Krista thilthawtheina chu ka chunga a um theina dingin, lawmtakin ka hratnawnahai hi suong lem tang ka tih” a ti ang khan kei khawm ka tlinnawna, ka tlaknawna, ka hratnawna hai hi suongin hmatieng fe pei a ngai a nih ti ka hrietsuok nawk hlak.

Chuonga lai zing chun, theitawp insuo a, kea fe-in biel ei fang lai hin thenkhat chun, “‘Ngurrivung hi mi motor hnungtieng dam a kawp lawr a, tling tuma thaw khawm annawh, insuklar a tum mei mei a nih.’ ‘Mi an nuom le nuom naw thu khawm dawn lovin biel fang dingin a fiel tawl a.’ ‘A thu a dit taluo, mi thurawn khawm a lak nuom nawh.’ ‘Mi thenkhat angin biek buoi-biek buoi chun mi ang lovin a suok el thei ding a nih’” dam an mi lo ti chutie! Hienga an mi tinahai hi dawnlet vawng hi Lalpa’n rem a la ti naw ning a tih.
Thingpan khuo panna lampuiah.  
Amiruokchu ka thilthaw hi ka hrietchieng.  ‘Mi lulul,’ ‘mani thu dit,’ ‘mi chavai,’ ‘invet,’ ‘mi ang lo’ chau ni lovin a rawng ka ibawl Lalpa le a ihmangaihai tading chun thi chen khawm ka’n huom a nih. MLA ka’n candidate-na le inzawma ka thilthawhai reng reng hi hnuoi hringnun khel tieng Pathien rorelna hmaah a la’n lang ding a nih. Tuta MLA candidate kristien-hai hai hi election result an puong le inruola thi ding ni ta inlang, kan thilthawhai hi Pathien hmaah thil inzapui um tak a ni el dim maw?

Released and published by: Ngurrivung Team 2017, Dated: January 21, 2017

Pathien in mi lawm a ti?

Kum 2017 Manipur Assembly a MLA ni nuom hai chét dan hi Pathien lawmtlak a ni dim? Pu Tv. Ngurrivung a tawngbau hi ngun takin lo ngaituo dingin mipui fiel ei nih. Eini tienga Pathien laka ei thaw ding khawm ngaituo sa bawk ei tiu. Hi le inzawm a Pu. Tv. Ngurrivung a lekha ziek hung insuo la ning a tih.


Issued by: Ngurrivung Team 2017



Tipaimukh Biel Fang Le Beisena

~ By Ngurrivung Team, Dt: 19 January 2017.

Kum 2016 Krismas hma met khan Pu Tv. Ngurrivung chu Aizawl suok sanin Tipaimukh constituency a khuo hai sir in hun a hmanga. Thla khat vang Hmarbiel, Vangaitlang le Tuidungah a cham a; biel sunga khuo pakhat char (in pahni umna) a sir thel ti lo chu a fang suok vawng a nih.

Za-ah in sawmkuo-panga vel ah lut in mipui hai kuomah an vote hlu tak a hni pei a nih. Tlangram inzin hi thil awlsam an naw a; motor a nei naw leiin a tam lem hieng Tuolbung-Maulien le hmun dang a tam lem hai ke a lawn a ngai hlak. Ei ram in hmasawnna ei mamaw zie chu a hretu vawng ei ni fur tah leiin, Internet khawvel le khawpuia um Tipaimukh Constituency a vote nei hai khoma ei hriet zing ding chu: Mani vote indik takin hmang tum seng ei tiu. 

Inzin report a kip a kawi a hril ding tam tak a um a, amiruokchu a tlangpui le beiseina thar hai tarlang phot ei tih.  

1. Pu Tv. Ngurrivung le ruoltha haiin mi in ah lekha an sem. An lekha sem hi poisa sum an nawh.

 




Pu Tv. Ngurrivung le a ruolhai lekha sem hi poisa sum an nawh.

 2. Lampui pik pal rin lovin, Pu Tv. Ngurrivung in khuo kilkhawr a um hai khom a kan rin nawh. A harsa khoma ram le hnam tadinga pensuok dinga lo intiem tah a nih.  

 

3. Motor fe theina (Lungthulien-Senvon) inkar ah mi pickup hnungah a chuong. Road le transport system tha tak ei ram in a mamaw ei hrietna kha a sawt vieu tah. 

Lungthulien a inthoka Senvon pan ding.
 

4. Biel mipui mamaw le tul hai ngun taka ngaithlak a ni a. An harsatna le beidawngna hai nisa in a liempui ngei theina dingin fak le dawn zawngna, lampui tha le thil dang hai hriltlang a nih.



5. Khawpui a um hai chet dan le ei ram mipui hai khawsak dan kar a hla hrat hle. INTHLAKTHLENG ei tul a nih.


Khuo thenkhatah nuhmei hai bu suk dan. 

6. Pi le pu haiin an hril hlak, tuchen a ei la hril, hnam ro hai cheibawl le humal ding tam tak ei nei a. Pu Tv. Ngurrivung chu a hmun ngeiah Lalruong Lungkap en in a fe.


Lalruong Lungkap, Patpuihmun.

7. Sorkar school a 'absentee teacher' hai ei naupang hai, nakie hun a thuoitu ni thei dinghai, hmakhuo an ngai nawh. Sorkar thawktu ha'n hmathuoitu an tul a. Biel sunga sorkar thawktuhai lu chu MLA a nih. 'MLA Pu Tv. Ngurrivung' a ni chun biel sungah umhmun khuorin hma a lak ding a nih.  

Tipaimukh constituency sunga naupang thenkhat hai.

8. Upa le naupang an mamaw indang a tih. Amiruokchu, sorkar a inthoka ei hmu ding ni si - thangpuina, healthcare, lampui tha, 'facilities' dang hai - chang phak mumal lo a ei um hi thil indik an nawh a. Thaw ro, var thar thut ei tiu, a pawi nawh; ei ramah indiktakin rorel ei tiu.

Pu Tv. Ngurrivung in upa deu hai lai campaign a nei lai.

Pu Tv. Ngurrivung le thalai hai.

9. I poun pha a zal nuom le i puonsil sil ve ngam mi Tipaimukh constituency in a mamaw a nih.


Ngainatu haiin Pu Tv. Ngurrivung ditsak takin an puontha, Puonripui, pha in an lo inzal hadam tir.

10.Mi indik, faru ngailo, taima, tlawmngai le inngaitlawm mi Tipaimukh Constituency sungah an la tam! Hieng ang mihai zarin ei ramah indikna changchawiin ro ei la rel ngei ei beisei a nih.

Ahnuoia lawng zaptu hin Pu Tv. Ngurrivung a inthok ngiet le ngen nei der lovin, nisa lum hnuoiah, Tuiruong vadung bula khuo hai lawngleng in a fepui. Ama hi 'Hmangaina Vote' nei a ni a. Hmangaina chu a hlu bek bek leiin tangka sum a inchawk thei a ni nawh!


Aw Lalpa, lawmthu kan hril che.


-Ngurrivung Campaign Team 2017-

Hmar Inpui Khuoma Lawmthu

Manipur Assembly 2017 le inzawm a Hmar Inpui in tukhom tan bik nei lo dinga thusuok a siem hi ka lawm hle a; thaw ding tha an hriet khopel. Mipui le pawl/party hai khom a inza taka thlop seng dingin ka ngen nghal cheu a nih.

Ngurrivung
Camp: Vangaitlang

Ahnuoi hi Hmar Inpui Press Release lo tiem ding ka fiel che/cheu.
--------------++---------------



HI-IMC-PR (001) 01/2017
January 09, 2017

11th Manipur Legislative Assembly Election ding le inzawma Hmar Inpui (Hmar Supreme House) a inthawka thusuok

Hmar Inpui (Hmar Supreme House) chun Kum Thar 2017 hi mitin malsawmna le hlawtlingna kum a hmang dingin ditsakna insangtak an hlan.


Nov. 22, 2016 a VTI, Rengkai, CCPur hmun a Hmar Inpui (Hmar Supreme House), Executive Council nei a ni huna Resolution No. 3-na dungzuiin- 11th Manipur Legislative Assembly Election March 4 & 8, 2017 haia hungum ding le inzawmin Hmar Inpui (Hmar Supreme House) hminga party support puong ni naw raw seh ti tha titlang a ni a, mimal le pâwl tuelkhawmin, Election Commission of India (ECI)-in inthlang dân (Model Code of Conduct) a zam kal a, mimal zalenna indiknaw taka palzut a hma la lo ding le inthlangna fel le thienghlim (Free and Fair) taka a fe theina dinga hma la seng dingin hnam sunga pâwl le mimal tin kuomah Hmar Inpui (Hmar Supreme House) chun  ngenna le inhriettirna a siem.


11th Manipur Legislative Assembly Election March 4 & 8, 2017 haia hungum ding hi India Constitution/dân,  Election Commission of India (ECI)-in inthlang dân (Model Code of Conduct) a siem ang le Pathien ditdan anga nei a ni ngei theina ding, buoina iengkhawm umlo a tha le tluong taka nei le ram le hnam ta dinga mi tha thlangsuok a ni ngei theina dingin tawngtainaa lo hrie dingin Hmar Inpui (Hmar Supreme House) chun mipuihai a ngen bawk.




Issued by:
Information & Media Cell
Hmar Inpui (Hmar Supreme House), General Headquarters
Office: Hmar Secretariat, HSA Campus, Rengkai, CCPur, Manipur
Email: hmarinpui@yahoo.com PIN 795 128

March 4-ah Tipaimukh Constituency Vote Thlak Ding: Election Commission

Voisun khan Election Commission of India chun election nei dan ding hai tlangzarna a nei a. Hieng ang hin ning a tih.

Tipaimukh Constituency hi Phase I vote thlak ding a nih. Phase I chu March 4, 2017. I vote hlu tak kha indik taka hmang dingin Ngurrivung Team chun kan ngen che/cheu a nih.



Assembly 2017

Phase 1

Date of Notification: 8 February
Last date of nomination: 15 February
Scrutiny of nomination: 16 February
Withdrawal of candidature: 18 February
Voting: 4 March

Phase 2

Date of Notification: 11 February
Last date of nomination: 18 February
Scrutiny of nomination: 20 February
Withdrawal of candidature: 22 February
Voting: 8 March

Chun, election sunga campaign a hmang ding Donation i thaw nuom chun Donation Page ah hin details enthei a nih.

Tipaimukh Constituency Mipui Hai Kuoma Kumthar Chibai Thucha

Press Release

Tipaimukh biel sunga mipui hai le ngainataka mi lo tawiawmtu hai po po Krismas le Kumthar Chibai ka buk cheu!

Kum a hung thar ang bawkin ei nun hai khawm thar sien ka nuom bek bek a nih. Kum 2017 hi mitin tadingin inthlakthleng kum hung ni ngei sien nuom a um. Chuongang bawk in ei ram del sungah hin hmasawnna thar a hung um ngei theina dingin khawlbing ngaidan hai sie thla in, beiseina thar nei seng dingin ka ngen tak meuh che/cheu a nih. Chu le inzawmin, kum 2017 Manipur Assembly election hung um dingah hin sum le pai in rorel naw sienla; Pathien a inthoka hmangaina indik tak hmangin unau lai rorel ei tiu.

Ei ram changkangna le hmasawnna dingin nang le kei ei mamaw a nih.

Ram le hnam tadinga in hahnemngaipui,     


(NGURRIVUNG HMAR)


Manipur Assembly Election 2017 Hun Sukfel Vat Ni Tang A Tih

Election Commission of India in Manipur, Uttar Pradesh, Punjab, Uttarakhand le Goa a election hun ding hai chu December 30, 2016 hin a poung suok el thei thu chanchin ei dawngna chun a hril.

"ECI members hai chu December 30 hin meeting nei an ta; a ni la la an naw khoma January 2, 2017, hma in election ni ding puong suok hman ning a tih," tin EC a thawktu hai chun an hril.

Manipur Assembly term fe lai mek hi March 26 hin a tawp ta ding a nih.

Ngurrivung le Ruolhai Rev.Thangngur Tawngtaina Pukah

By ~ Ngurrivung Team

Mi tam takin ei ram sunga hmun poimaw hai humhal le vawngthat a tul thu an hril hlak a, amiruokchu a tak ngeia siemthat tumna lungril a piengnaw leiin am a ni ding voisun chen hin ei mi hmasa hai lo sirna le sulhnung hai lungsiet um takin an la um zing el hih!

Tv. Ngurrivung le ruol threnkhat hai chun tukum November thla bul lai khan Rev. Thangn­gur a tawng­taina puk, Phulpui, Van­gai tlang a um le hmun poimaw hai a hmun ngeiah enna an nei. Ei hnam le inzawma hmun poimaw hai hi humhal le cheibawl hi thil makmaw a nih.

"Ei ram tungding nawkna ding chun ei intanna a zung hai humhal le cheibawl a tul a nih," ti'n Ngurrivung chun a hril.

Tv. Ngurrivung le ruol thenkhat hai in Phulpui rama Rev Thangngur a tawngtaina puk an va kan lai. Kum: 2016

RX 100, PULSAR LE VAIHAI KE BULAH (M.L.A. candidate ve meu chu)

By ~ Ngurrivung, Tarik: 25/10/2012

Zantieng dar 4 lai a lo in ri ta a, Bawrsap hlak chun a tiem angin, sinsiena (Symbol) chu a mi pek el theinaw leiin, ka ruolhai lo suk fel dingin kan sie el ta a. Chuongchun, zan anthim tah ti ding chun Bawrsap Pisa a inthawk chun Rx 100 chun mi pathum kan in phur phei a, Zote Vanga ka u Thanga-hai inah bu kan fak sawk sawk zo chun, fe dingin kan in siem ta a. Ka ruolpa hlak chu iengleia phur viu amanih, ti ding khawpin, an inah va fe a, thuomhnaw lum van belsa khawm chu a nuom ta chuong nawh a. Chuongchun, January ni 14, 2012 zan boruok inthieng vawk kar ah, dar 8 pel hret a chun kan suok ṭan ta a.


Kan Bike, RX 100 chu a ṭha bék naw leiin, a gear No. 3 hmang thei annawh a, chuleichun khal thiem deu hlek a ngai a. Kan hang tlán chun antli deu vawr vawr a, Thlasiklam khawm chu a paw éng phút a, chuonga kan tlán lai chun mihriem hringnun sáwtnawte, mani inhawitina ding zawng a ei tlán rak rak dan hai dam hi ka ngaituoa. Hriengkawt tlang kan tlung ṭep chun Sipai check gate a lo um a, chu taka chun an mi lo inngir tir a, ka ruolpa’n, senṭi kuomah chun, “MLA candidate ka phur a nih,” ti’n intithei deu hlek ni áwm takin a hang in report a. Duty pa chun, a mi awi hmel rak naw a ka hriet leiin, kan lekha chu ka hang phawr te te zo chun an min fe tir nawk ta a. Hriengkawt tláng kan hang pel chun thautui kan nei tlawm deuva kan hriet leiin lamsuk a po chun  bike chu kan that pei a. Chuongchun, ka mobile phone a inthawkin hla hai ngai thla in, lungrila kan in vawizawnghai kan ti ti malam pei a, chuong a kan tlán lai chun, lam thlang ah, pucca road ni lo chin a chun kan lo tlu der el a. Sáwtnawte kan chawl zo chun kan hang tlán nawk a, ka ruolpa hin bike hi a khal thiemnaw sa’n, election campaign a phúr lei ringawt a, a mi fepui amanih, aw! ka ti lungril deuva, hang indawn ngaina hlak um chuong lo. Dam te te’n khal la ne’l, ka ti ta ringawt a. Sawtnawte hnung a lamsak, khopang hneng záwngin kan tlu nawk a. A tawp ah, Lalchunglur chun, kan tlukna san pakhat a hung hril suok ta a, dei a lo ti taluo leiin, a kuthai kha a nuom ang in a lo thunun theinaw kha a lo ni zing a, chuongchun, ka ramawl chu alaiah kan pawt tléra, a kut khingtieng khingtieng chu kan tuom a, chun ka jacket, bag a mi chu kan phawr a, a hák zo chun kan tlán nawk ta pei a.

Santing tlungna ding hla fe a la ni lai chun kan bike chu a thi tawp el a, hang sir hring kan tum khawm chun hring thei ni ta lo, thautui a zo man tah ti’n kan hang envel a, a la ral si nawh, saidawium a kan thuatui phur khawm chu a lo pút nawk a, bike tanky a chun thun thei zát zát kan thun a, a bang po chu sehriet saidawium in kan thun a. Theitawp a kan bei hnung chun, vangnei a siemin kan bike chu a hung hring nawk theita hrám a, chuong chun kan tlán thei nawk ta a. Sipai check gate pakhat kan tlung nawk chun, kan bike hnungtieng bag a kan khai bawrluoi sung a mi kekawr chu kan phawr a, Chunglur chu a kekawr chung a bun ding a ka ti chun, ‘bal pal a tih’, ti’n a kerkawr chunglem a hlip phawta, a lai a chun a bun ta a, chuongchun tluong takin kan tlán nawk ta a.

Santing tlung tawm ṭep chun sipai check gate a lo um nawk a, chu tak a chun, kan in report a, Chunglur chun meiziel, duty pa kuomah chun a lak kai a, kan fena ding le MLA candidate kan ni thu a hang hril vel a. Kan bike chuongna le a hungtieng a kan bag kan khai bawrluoi hai dam ka hang en chun, Pathienin Abraham kuomah thu a thlung laia a nuhmei Sari a lungrilin a lo innui ang deu khan, ka nui an za rúk khawp el a, hieng lai hin ka ruolpa Chunglur hlak chu a titak viu bawk si. Chuongchun, check post chu kan tlán pel nawk ta a. Santing khuo khawm chu a re in a lo re tlawk tlawk el ta a, kan tlán pei a, Santing kilometer hni vél kan tlán pel ti ding a chun, kan inringnawkarin kan tlu náwk der el ta a.

Ka ruolpa Chunglur chu lamlien lai chun a bawk tawp a. Kei chun, kan bike chu ka man tlat a, hlam hni vel chu a mi hnuk phei a, a tawp a chun kan bike khawm chu a thi tawpa. Chuongchun, lamlien a chun kan zal véng véng a! Ka hang tl ír a, Tlápa chu Kailam ráwl tlép tuor chung zawn a chun a de kung el a! Ráwl kuo-kár, Tla éngin a hang sun tle súr el hai chu a mawi ém ém a, a boruok hlak chu a dei leiin, a hip deu vawng awng a. Iemani chen hnung a chun, kan thova kan hang in en vel chun, kan khup vawitieng ve ve chu kan kekawr bunthuo-hai inek rak khawpin kan tet ve ve a. Ka ruolpa Chunglur lem chu a mitkho le a bieng a tet hlip hrawk a, an hang tawk chauvin thisen tlawte a hung suok pek a. Ka ngaituoa, kan tlúkna lai hi lamkawi, rawlkho lai dam lo nisien chu, iem kan chang ding?

Lampalailak ah um el ngaina hlak umlo, kan thova, bike chu kan hang suk hring tum a, hring el thei lo, Chunglur chu a chungah a chuonga, keiin ka thei tawp a hratin ka hang nam tlán hnungchun a hung hring nawk thei ta a. Kan tlán pei a, Kailam ráwl hnuoi kan hraw sung chu a sawt hle’n ka hriet, a chang leh ka lo in lusu met hlak a, a hung intet phat ka har nawk zawk hlak a. Chuongchun, Leizang Phai, Tieu súm in a bawm chuoi a chun kan hang tlán lut nawk ta a, khaw lailung laivel kan tlung chun Sipai check gate a lo um nawk a, chu tak a chun Chunglúr chu a van report a, kei chun mi in ṭhiekna hlek le ngaidi hlekhai chu inkhawmin mei ka lo sem a. Meilum kan hang áwi tak tak chu inhawi deu a nih, amiruokchu kan fena ding a la hla bawk leiin hang insuklum nuom hle in lang khawm kan fe san a ṭul nawk ta a. Chuongchun, kan fe pei a, Nisa a suok uôr uôr chun Zochung kan tlung a, ka ruolpa Chunglúr hmelhriet hai in a chun bu kan fák a. Chunglúra chun, intimna nei der lovin MLA candidate ka ni thu le kan thiltumhai chu a hril a, anni khawm chun kan thiltum dán chu ṭha anti hle a. Bú kan fak khawp chun kan fe nawk pei a, Bike-in vawithum lai kan tlu ti lo chu dam le hrisel takin kan tum ram chu ni 15, Juanuary, 2012 Pathienni z íng dar 10 vel chun kan tlung ta a.

Tarik ni 15, January, 2012, Pathienni chawhnung tieng chun Parbung khuoah vántlang inkhawm kan nei a. Zána chun, mithi inah Pathien thu hrilna hun ka nei bawk a. January 16 Z íng khuo a hung var chun Tv. Lalkhawthang leh Campaign di’n Parbung khuo a inthawk chun ke-in kan suok ṭan ta a, Chunglúr khawm chu kan suok ruol ruol chun, Pathien thlarau a siemtharna beiseiin Camp a lut ding chun Churachandpur tieng pan chun a suok dawk ve nawk nghal a.

Lungthulien chu z íng dar 9 vel in kan tlung a, Village Authority Chairman inah khawtláng ṭhuoitu- V.A., Val upa le HYA-hai leh kan inrawnkhawm a, vántlang inkhawm nei kan nuom thu kan hril a, anni chun mipui tam lem leh, nei a ni theina ding tiin, zán dang a hun hmang el dingin remcháng an mi ruotpui ta a. Chuongchun V.A. Chairman pa inah inkhawmna le ṭawngṭairuolna kan nei zo chun Senvawn tieng panin kan suok nawk ta a.  

Senvawn kan tlung chun khawtlâng ṭhuoituhai kuomah vântlang inkhawm ko kan nuom thu kan hril a, anni chun khawtláng huopin Pathien thua inpawl khawmna le intuoi tharna nei dingin an lo riruong sa a ni leiin hun an mi pék theinaw a. Zánah, vántlang inkhawmna kan nei theinaw ding ti kan hriet phing chun, Rawvakawtah vántláng inkhawm kan nei thei inbeiseiin, zán bufak khawp dár 5 vel chun kan suok a. Khuo tlung tawm ah ṭawngṭaina kan neizo, zán dár 7 an ri ṭép chun khawsung kan lút a, Rawvakawt hi ka vawikhat hmuna a ni bawk leh zán thim hnuoi ah a khaw um dan khawm ka hriet mumal nawh a. Khawtláng ṭhuoituhai kan biek rawn hnung chun vántlang inkhawm an mi ko pek a. Zán dar 9 vel in inkhawm kan ṭan thei hrám a, kan inkhawmna hmun hi hmun laili, hmun inhawi deu niin ka hriet, chun kan inkhawmna dawsáng khawm hi Ram le hnam tading a hringna lo inhlan tah Pu Hmangtuothang Lungdaw a nih, hi lei hin, kei khawm vangnei kan ti hle. Pu Hmangtuothang hi Hmar pasal ṭha, kum 1960 lai vel a unau Thadohai leh ei buoi laia Hmar hnam tadinga hringna lo in hlan a nih, ama hi ka pa leh ruolṭha tak anni a, a thi ṭum khawm hin ka pa hi abán ah an kap hliem ve a nih, ka pa khawm kha a ngirdán kha loin her danglam met naw sien chu an kap hlum ve ding a nih.

Thuhrilna ka nei zo chun, HYA ṭhouitu lo ni hlak tah, pa pakhat hi a hung ngirsuok a, Pu Hmangtuothang Lungdaw inkhumna ding thawve dingin a mi hung ngén ve a, kei khawm chun iengtin am aw, ka dawn ding ti khawm ka suongtuo zo hma chun tlangval pakhat hi hung ngirsuokin, “keiin a (Pu Hmangtuothang) Lungdaw inkhumna ding chu tum vawng ka tih, chun vawi zán a inthawk hin Pu Ngurrivung hai leh ram le hnam ta dingin vote zawng ah ka suok ding a nih”, ti’n a hung khék suok a. Hi taka, tlángval hung ngirsuok pa hin thiltum a lo nei a, MLA Candidate pakhat tadingin z íngah z íngnawk vel el ah, pawisa a hung tlung hun hunah campaign a suok ding a inring sa diem a lo nih. Hla sakna le ṭawngṭairuolna hai kan nei zova, kan ṭin hnung chun u Lalnunmawi-in an inah thingpui dawn dingin a mi kova, thingpui kan dawn zo chun fe dingin kan insiem a, chuonglai chun kan inkhawm lai a Lungdaw chung ding tum ka tih, titu pa chun mi zui ve dingin an siem a.Chuongchun, an intieng kan fe tung a, in kan tlung chun a nu le pa lo zal ta chu an hung thova, a zán zánin election campaign dingin mi zui a tum thu, a nu le pa-hai a hril a, a pa chun hieng hin a ti a, “nangni rawi hi, mi MLA in candidate-hai motor leh nasa deuvin an thaw a, MLA in candidate in suk ho (nép) zo vawng a nih” tiin a hril chu, kan innui dar dar chu tie! Hi tak a, kan ruolpa hi Tv. Lalneithang a ni a, a pa khawm hi EFCI kohran upa a nih. Lalneithang chun a pa cheng 1,500/- vel a hni a, a pa khawm chun sel lovin phal takin a pek el a nih. Unau pa Lalneithang hi ahmaa a thiltum leh chun keini ami hung thawpui hi chu an persan hle’n ka hriet, election motor a phur ding tiin thing motor load hni vel a lo  lak khawl sa chu, motor neinaw tak hai leh kan in tlawp ta leiin a chan el a nih, hi chau hi nilovin, ama pawisa iemani zát sengin chawlkar hni váng kan invak hnungin lovát a ṭan ve chau a nih.

Senvawn chu z íng dar hni vel in kan tlung a, z íngkar dár 5 velin ka tho a, khawtláng ṭhouituhai kuomah vántláng inkhawm mi ko pek dingin kan hni a, z íng dár 8 le dár 9 inkarin vántláng inkhawm chu an mi ko pek a, mipui a fé khawm chu sawm khat vel ning kan tih, Táwtawrawt an min hmang tir tho leiin, mi sawm vel chau ni inlangkhawm kan dit tawkin inkhawmna hun chu kan hmang a. V.A. Chairman pa inah bu kan fak khawp hnung chun Parvachawm tieng pan in, ke-in Sitam (Tuibûm) lamsuk a chun kan fe tla a. Tuibúm kan tlung chun, kan insil fai a, chuonglai chun u Lungmuonhai motor, Parvacháwm tieng a fe ding a um remchang leiin kan chuong ve a. Senvawn a khan z íngkar kan hma ah HPCD hai motor-in Parvachawm tieng an fe ve kan hmu leiin Lalkhawthang chun, “nakie an inkâpna karah um pal ei tih, aw!”, a ti a, kei chun, “An mi kap fuk chun ana ding ana,” ka ti ve ringawt a. Khuo kan tlung ṭep chun keini chu kan ṭum a, ṭawngṭaina kan nei zo chun, khuosung kan lut a. Khuosung kan lut chun HPCD-hai chu khuo kuomah an lo inkap thu chu kan hriet ve a. Khawtláng ṭhuoituhai kuomah vántláng inkhawm mi ko pek ro, ti a ngenna kan siem chu, rem mi ruot pékin, vántláng inkhawm chu kan nei thei a, hi taka hin rem chang a hmangin, Pavachawm bieltu MDC khawm chun, thuhrilna ka nei zo chun thu  hrilna a nei va nghal a.
Zíngkar bufak khawp chun ka u Ngurliensanghai chun Jeep-in hung intla’ng kan ti cheu an ti leiin, an Jeep-in kan fe a, Sitam (Tuibûm) kan tlung chun in pakhatah HYA ṭhuoituhai rem tina’n inkhawmna kan nei zo chun kan fe nawk pei a. Senvawn kan hung pel met, Senvawn le Lungthulien inkar a chun Pu Chaltawn le a rawihai chu kan in tuokpui a, ama chu a hma le hung a sipaiin an véng a, ama ka zuk hmu chun a hung innui deu suia, ami hmu lei amanih, annawleh, hlim hmel a hung suk lang ve reng reng ti khawm ka hriet nawh, ama chu motor pasari vel inzui dul dulin an hung a, keini Jeep ṭhanaw deu leh, ka hang ngaituo chun nuizat kan um khawp el!

Lungthulien chu zántieng dar li vêlin kan tlung a. Zán ah chun vántláng inkhawm kan nei thei a, a zinga chun kan Symbol a hung tlung ta bawk leiin Parbung ah kan va lak a, chu zo chun Sipuikawm tieng kan liem tla a. Sipuikawn chu Nisa tlák tawmin kan tlung a, khawtlángin umni khámin football anlo pét a, zánah vántláng inkhawm an mi ko pek theinaw ding an leiin thu hrilna hun an mi pek hrám a, thu hrilna hun kan nei zo, zán bu kan fak khawp chun Tipaimukh tieng pan in a zán a zánin kan suok nawk a, zán dar 8 velin Tipaimukh ah khawtlang ṭhuoitu pakhat-hai in ah vántláng inkhawm an mi ko pek a, thu hrilna, hlasakna le ṭawngṭairuolna hai neiin hun kan hmang a. Tipaimukh a kan umlaia, thil pakhat nuizat um ve deu chu, naupang pakhat hin khawlai dungah tawlailir ke hung nam vir malam in, ‘Ngurrivung, ngurrivung, ngurrivung’ a hung ti pei chu tie! Ka hming le Tawlailir ke nam vir khawm hi an hme deu n íng a tih!

Ruonglevaisuo (Tipaimuk) a inthawkin motorboard in kan intáwl thlak a, Thingpuikuol ah kan ṭum a, vántláng inkhawmna kan nei zo chun zán dár 7 vélin |ieulien ah vántláng inkhawm kan nei nawk a, chu zo chun Thingkaldawr ah kan riek lut a, Thingkal dawr le Kangrengdawr inkar chu u Lalchunghnungin a motorboard hire ah a min chuong tir nawk a, Kangrengdawr a inthawk chun Tuiruong dunga khuo um kan sir hman hmanhai chu ke a fe in kan zuk sir pei a, a remchang dán zirin Hall amanih, mimal in ah manih inkhawmna kan nei pei a, hmun ṭhenkhat a lem chun, “Pu Ngurrivung rawihai (agents) inn í?”  tiin, an mi chibai zing khawm chun an mi hriet chuong nawh a, asan chu Pu Ngurrivung chu pa lien deu, kum upa tieng ni dingin an lo ring leiin! Ankhasuo kan tlung chun, Tuiṭhaphai a inthawkin ka ruolha’n an mi hung phone a, lekha pawimaw, ka hmingziek namkai (singnature) ngei ngeina ding a um leiin le ka Bank Account a pawisa a tlawm leiin ka ruolha’n an puhai pawisa lo hmang remchang ding an hriet bawk leiin, ka bank account ah zuk thun vak a lak dawk nawk ding khan ka hmingziek (signature) a ngai bawk leiin, lotheilovin Churachandpur tieng ka fe a ngai a. ( Hitaka ka ruolpa a mi hung phone tu hi election lai, hungsuok a tum naw a nih, amiruokchu an pu’n hang chawl rawh, a ti ṭal lei a hung suok mei mei a nih, in a hung tlung chun an nu’n ‘Bai, Ngurrivung I hriet hlak am? MLA an candidate ding a nih’, a hang ti chun, ‘hrie e, ka ruolpa, kan ch ínlai a inthawk a inpawl kan nih, mi po povin vote naw hai sienkhawm, an candidate súng phawt chun ka naupa leh chau khawm ni inlang kan vote char char ding a nih’, a ti pek chu tie!).

Ka ruolhai Tv. Lalneithang le Tv. Lalkhawthang-hai leh chun kan pathum a Vangái tláng zuk hrút tung ding kan ti chu, kan inṭhe a hung ngai ta a, hieng laitak hin pawisa hlak chu cheng 3,000/- lai chau kan nei ta si, anni’n cheng 2,000/- an chawi a, keiin cheng 1,000/- chawiin z íngkar chun kan inṭhe tah a. Anni chun Ankhasuo a inthawkin Vangái tláng an zuk hrút tung a, khuo pakhat a lem chun Pu Ngurrivung agent-hai tiin, tlangvál zurui ṭhenkhat-in pawisa lo hni lui an tuma, chu tak a chun, pawisa annei naw thu le an pék theinaw thu an hril khawm chun an hnawt zui a, pawisa lak pék ṭal an tum lei chun Tv. Lalneithang chu a dawtheinain a tlin ngang ta naw n íng a tih, pakhat chu a áwmpar ah a ṭham a, kut tlak a tum el tah a. Chulai tak chun, Tv. Lalkhawthang le khawsung mi ṭhenkhat chun an khap dei thei hrám a nih, hi lei hin ṭum iemani zát chu khawsung lut tawm ṭawngṭaina ah, Tv. Lalkhawthang chau a ṭawngṭai pha a nih.

Ankhasuo a inthawk chun Tata Sumo’n Jeribam ka pan a. Tuiruong dung hi Ankhasuo chen bak ka la fe naw leiin le Meitei ṭawng le Vai ṭawng ka thiem bawk naw leiin, iemani tak a chun ka bangbo ve khawp el. Ankhasuo ah chawlni a vántláng inkhawm kan neizohlim a chibai mi hung búktu lai a pakhat, u Hmangaisang chun lotheilova Churachandpur tieng a ka fe a ngai ti a hriet chun, Jeribam chen a mi zu thak thei ding thu a mi hung hril a, kan lawm hle laiin, an motor a sungha’n hmun dang ah an lo hmang leiin a remchang nawk nawh a, chuleiin z íngkar Jeribam fe ding motor a mi zawng pui a, motor kan hmu fel chun Jeribam to Churachandpur Sumo Ticket Counter le a neituhai chu a hmel hriet anni bawk leiin Counter neitu le a phone no chu a mi hrila.

Ka la fe ngainawna an leiin Jeribam le Lakhipur túm a hnai lem, ti le, khawla’m ṭum lang a remchang ding ti khawm ka hriet chuong nawh a, ka ṭumna ding a remcháng chu, ka chuong puihai kan dawn a, ka chuongpuihai kuomah chun MLA candidate ka nih ti chu tukhawm in an hriet nawh. Jeribam kan tlung chun ka ṭum a, Churachandpur fe ding Sumo ticket katna chu ka hang indawn chun, minute 30 vél in ka lo inhnu ta leiin motor ka nang hman ta naw a, motor dang fena ding remchang a um el rawi am, tiin ka hang zawng vel khawmin ka hmu ta naw leiin a z ínga fe dingin Sumo Ticket chu ka lak a. Ticket ka lak zo chun Hotel riekna ding ka hang zawng a, aman tláwnna tak ni a ka hriet a chun ka tlung a. Hotel man le ka bufak man hai ka hang sút chun a báng cheng sawmnga vel chu ka la nei a. Hotel a chun kan silfai a, nisa lum dam ka awi a vel a, pawisa ka nei tláwm ta a chu hang thaw dan ding dang um ta nghal lo chu lungkham neilém lo ni awm tak chun ka in ve bawr bawr a. Z íngkar chun ka tlungna hotel chu suoksan in dár 6 le ti vel a chun Sumo Counter chu ka tlung a, Counter neitu chu iemani chen midang leh kan nghak hnung chun a hung ve ta hlawl el a, chuonga nghakhla tak a kan lo thir lai chun Motor a remchang naw thu a hung hril ta a. Hitak hin chu, ka lungrilin Pathienin rem a ti naw ning a tih, ieng ieng khawm nisien Ankhasuo tieng kirnawk ka ta Vangái tláng zuk hraw ve’ng ka ta ne’l tiin, kan ngaituo a.

Hitaka, Sumo Counter neitu hi a fel khawp el a, Sumo a rem ta naw phing chun Churachandpur fe ding motor a mi zawng pui a, Churachandpur tlung ding a um ta naw leiin, Imphal chen tlung ding a mi hmu thei pék hrám a, Bus-in Imphal chen tlung ding chun vaihai kar ah ka hang inhnaw ve a. Kan Bus chuongna chu kan intar khawp el a, kei lem chu vaihai ke bul ah Hmar puon Necktie leh, Coat hnuoi ah MLA candidate card chu awrin, MLA candicate pakhat ni ve bawk chu thei le theilovin, ke kham raka int ímin kan ṭhung a, iemani chen hnung a lem chun vaihai ṭhungna sir a chun ka mawngtam ka hang bang ve a, a zie a um deu chu tie!

Zán dár 8 vel chun, lam lak ah, kan bus chuongna chu a sie a, Churachandpur ka tlung thei da‘l awm de aw!, ka ti lungril a, iemani chen an siem hnung chun kan fe thei nawk ta hrám a. Chu hnung chun, Pathien zárin tluong takin kan tlán pei a zán dár 12 velin Imphal kan tlung a, zána chun, a tam lem chu an inhai pan in an fe tawl a, iemani zát chu Bus ah kan riek a, kei khawm inṭhung hlei theilo kha, a seat-ah inhawi ti duevin, ṭhung-a-zal in zán boruok dei tak kar a chun ka in thei ve ta a.
Zíngkar khuo a var uouh uouh chun, kei khawm bus a inthawk chun ka ṭum a Churachandpur bus counter umna chu ka zawng ve a, reksaw pu pakhat kuomah chun ka fe nuomna ka hang hril chun, a mi va thak, a hmun hi ka hrietchieng nisien chu ke khawmin sawtnaw te lawn a tlung theina ding a nih. Bus Counter ka hang tlung chun, Bus réng réng hmu ding a lo um nawk ta naw a. A lan hma deu leiin bus an la hung naw ning a tih, ka ti lungril a. Iemani chen hnung a khawm chun bus réng réng hmu ding a umnaw lei chun ka hang indawn vel chun Churachandpur DC ‘n election duty-na dingin bus a man khawm tawl leiin Bus a service naw a nih ti ka hriet a, hang thaw dan ding rak hlak um lo,  bus station lai chun ka hang um ve tawp a. Iemani chen hnung a chun Churachandpur fe ding sumo chu a um hlau el a, chuongchun kei khawm chu ka chuong ve tawp a, Hmar Venga ka ruolpa, Ramropui chu ka zuk phone, “Bai, Sumo-in ka hung lamsir a khan pawisa cheng 150/- leh mi lo inchan rawh” tiin.

Ka ruolpa, Ramropui-hai inah chun kan silfai a, bu kan fak khawp chun DC pisa tieng chu panin ka ruolhai nupa leh chun mi scooter hawin kan in phur tunga. DC pisa kan tlung chun, kan hang in report a, in report hun nili laiin lo inhnu ta inlang khawm election hma ni 27 January chen chu an mi lo nghak thei thu an mi hril a. Election observer pa chun kan thil thaw ding hai chu mi hrilin, kan hmaa mi tam takin an lo nghak ṭhup lai chun ditsak takin officer pakhat chu kan lekha, kan suk fel hma po chu mi ṭhangpui dingin a hril a. Ka ruolhai leh chun kan hangin ena, a rúk tak chun kan nui chu an za deu met ni’n an lang.

Lekha pawimaw, thaw ding po po kan suk fel hnung chun Pabung tieng a ka fena ding kan buoi nawk tah a. Ka ruolpa, Ramropui chun, “Bai, DC roomah va lut la motor va hni tawp el rawh” ti’n ami hrila, keikhawm chu DC room a chun ka va lut a, “lunginsiettakin, Parbung tieng a ka fena ding Motor mi ngaituo pek rawh,” ka va ti ta chawt el a, ama khawm chun, a zingnawk el election ni ding anta leiin motor a um ta naw thu a mi lo hril zo chun ka suok a. Ka ruolpa le chun kan hang ti ti nawk a, a thaw dan ding um lo chu, ka ruolpa thu awiin, DC roomah chun ka lut nawk a, ka hril ngai bawk chu ka va hril a, DC chun, “Motor ka ngaituo pek cheu chun, mi dang haiin chuongchun, khangkhan mi t íng an ta, nakie buoitlak a tih”  ti’n ami lo dawn nawk a.

DC pisa a inthawkin motor kan hmu theinaw phing chun a theina ding awm a kan hrietna na a hai motor kan zawng a, election a dingin an lo hmang tawl leiin hmang ding réng réng kan hmu naw leiin fiemthu’n Pu Chaltawn a agent ṭhenkhat ha’n “kan motor ah hung chuong la saiip ah thun kan che a, mi tukhawm hmulo dingin phur kan che ne’l an nawm” dam, an ti a. Atawp a chun, Bike bawk a fe dingin kan suk tluk nawk ta a.

Pu Remsang chun, kei ka nuom phawt chun, a bike (pulsar) in a mi phur thei thu, ka ruolhai a hung hril a. Chuongchun, ni 26 zingkar inhma deuva suok ding chun kan in siem ta a. Z íngkar kan hang tlán a, Churachandpur kan pel met chau ti ding a hin, lamtung ah kan bike chu a lum taluo leiin a thi tawp a, a thaw dan ding um nawk ta lo chu! Iemani chen kan chawl hnung chun Churachandpur tieng kan kir nawk a, Workshop ah kan bike chu kan insiem tir a, inah bu kan la zu fak te te zo chun kan fe nawk thei hrám a. Kan bike an fuk rak naw leiin nuom angin kan tlán hrat thei naw a. Thanlon tlung hma lam ṭhat lona lai bus pakhat hi kan hma ah a tlán a, tlán pel kan tum hlak chun lam min ken nuom bawk lo, ka coat dum khawm pilvut var rakin a kai a nih, ka ruolpa lungsenin hrilnaw ding ding a hril pha hnung chun lam a min ken hrám a. Amiruokchu, an hmaah sawtnawte kan tlán hnung chun kan bike chu a lum taluo leiin a thi nawk a, an mi tlán pel nawk ta a.
Ka ruolpa, Remsang hin a min dawi rak naw manih, Búkpui tlung hma lungkawhrawt lai chun a mi tet nasakhawp el a, hieng hin, “Bai, candidate danghai hi bike a hin phur tawl la chu iem an chang ding?” ka ti hiel a nih. Zán dár 9 velin Damdiei kan tlung a, bu kan fak khawp chun kan tlán nawk pei a, zán dar 11 velin Taithu kan tlung a. Taithu kan tlung chun ka ruolhan Damdiei chen Bike pahni in an mi lo hung tuok thu le Arsa ka hme ding an lo siem thu ka hriet chau a nih.

Tarik 27, January chun zingkar inhma deuvin ka tho va, Taithu khuo chu ka thei chin chin ti’n, intin lutin ka symbol chu kei in ka sem ve tawp a. Iemani chen hnung chun ka ruolhai khawm an hung tlunga. Chuongchun a thei chen chen chu symbol chu kan sem ve tawp el a. Bu fák khawp chun ka ruolhai chu bike in Tuolbung tieng le Parbung tieng a fe ding chun kan rel fel a, kei ruokchu Vangái tláng lut dingin Taithu mi pakhat Tuiruong chen lampui mi hriltu ding ṭhuoiin z íng dár 10 vel chun Taithu ka suoksan nawk ta a.

Phúlpui chu chawhnung dár 1 velin ka tlung a. V.A. Chairman in ah kan report zo chun ka symbol chu ka thei chen chen ka sem a. Thingpui ka dawn zo chun Ngampabung tieng ka fe a. Ngampabung ah, ka thaw ding ka thaw zo chun nisa tlák tawm chun Phulpui tieng pan in ka hung k ír nawk a. Phúlpui a inthawk chun ka fe pei a, Patpuihmun chu zán dár 8 velin ka tlung a, intin deu thaw lutin ka symbol ka sem hnung chun Sártuinek tieng pan in ka suok nawk a. Lampui a chun Mobile phone in hla ka ngai thlak malam pei a, hmun ṭhenkhat ah Mobile Phone Network a lo um leiin ka ruolhai dám, ka u Siemi dám phone in kan biek pui a. Chuongchun, harsatna umlovin Sártuinek chu zán dár 11 velin ka tlung a, V.A. chairman pa inah chun innghatin inmu inhnik taka in in, z íngkar inhma deuva thoin, ka symbol chu a thei chin chin chu ka la hang sem a, Vote khawm harsatna um lovin tluong takin tlák fel a nih.

Véng ka tlung chun, election office, u Máwna-hai inah ka ruolha’n an lo hawng leiin, zánah, inkhawm ṭinin kan inpan khawm tawla, chutaka chun u Rema’n a tlasiet thu hieng hin a hung in zawta, “Ngura, ka lunginsiet taluo che…. Election nawk phat chu ei symbol a khawm ‘Pathien chau ringsan a ngir’ ti hnuoi a hin, ‘Pawisa khawm kan nei ’ ti ziek sa táng ei tih” a zuk ti chu, kan hlim tláng hle. Kan pawisa hmangnahai kan hang sút vel chun, ka pawisa cheng 40,000/- vél bák ah, mi mipek tling khawm chéng 10,000/- vel kan hmang sa bawk, aréng a kan sum hmang po po chu cheng 50,000/- chuong met a nih.   



Ei Lalpa chun, "Nangni laia túkhawm hin in insáng báwl tum unla, a tirin ṭhungin, báwl zona khawp sum in nei le nei naw hre dingin, a man ding chin tuin am sút náwng in ta chuong naw chun, lung phúm ta zeta a báwl zo thei si naw chun, a en taphawtin nuisan an ta ‘Hi mipa hin in an kal zet a, a báwl zo thei si nawh a,’ t íng an tih”, a ti si a(Luke 14:28-31).  Amiruokchu, ei Lalpa vek hin, Amihai tading chun  thirkawtkharhai meu khawm an hawng fawm tir pei si a( Tt. 12:10). Election ṭum tla thei a ka um hi Lalpa mi ṭhuoina lieu lieu a ninaw thei nawh.

Kum 2012 a Ngurrivung Hmar Vote Share

Kum 2012 khan ram le hnam hmangaina leiin Ngurrivung Hmar chu Manipur Assembly election-ah Independent in a ngir a. Ruoltha lainatu hai leh ke a lawnin biel an lo fang hlak a nih.

A teppui hai chu Dr. Chaltonlien Amo, Dr. Lallukhum Fimate le Pu Ngursanglur hai an nih. Vote 99 a voikhat ngirna in a hmu a nih.

Kum 2012 a Tipaimukh Constituency a candidate hai vote hmu zat.

Kum 2017 hin Tipaimukh Constituency a bawk ngir dingin an singsa mek a; vote 99 a inthawkin hratna chang ngei tumin campaign tan an tah. November 2016 thla khan Round III campaign zofel a ni a. A sirna khuo mihai le inpawlna a hril hlaw tak chu "ei ramah Pathien a inthawka hmangaina nei mi indik sinthawtu ei mamaw a nih" ti hi a nih.

- Ngurrivung Hmar Campaign Team

Pherzawl District Thar le Inzawm a Press Release

Office of
Ngurrivung Hmar
Parbung, Pherzawl District, Manipur.

Sl. No. 2016/12/12                                                                                                        Place: Rengkai

Press Release
Manipur sorkar in December ni 8, kum 2016, a revenue district thar pasari — Pherzawl, Tengnoupal, Kakching, Kamjong, Noney, Jiribam & Kangpokpi — a siem le inzawmin ngaidan tam tak um ngei a tih.

Nisienlakhom, Pherzawl District thar hi kei chun lungril takin ka lawm hle thu ka puong a. Hmasawnna lampui dinga sirbi poimaw tamtakhai laia pakhat a nih. A sunga cheng hai popo tadingin malsawmna hnar a ni ngei ka beisei.

Chu ruolin, ei ram sukchangkangna dingin sinthaw ding tam tak a la um a; chuonghai bawzui le sukpuitlingtu ding chun Pathien a inthoka hmangaina indik tak nei le mi indik thuoitu/sinthawtu ding ei mamaw a nih ti hrezing ei tiu.

Pherzawl District damzing raw seh!


(NGURRIVUNG HMAR)