2012 Election Thlirlet

Kum 2012 Manipur MLA inthlangna a ka thuhril tlangpui
 By - Tv. Ngurrivung
MLA kan candidate ding hi mipui laia hang puongsuok hi, ka huphur em em a, mihai ka hei en a, chun kei le kei ka hangin en nawkin, ka hawphur kawp el a, ka thu thlukna chu “Lalpa i nuom leh mi hmang la, i nuomnaw leh mi hmang nawla ne’l,” ti hi anih. Kum 12, 13 vel ka ni laia inthawka, lungril tak a ei ram politics lo inhnik ni lang khawm, mi lai hin ka hrilsuok ngainawh a. Mipui hma a ka hril suokna hmasatak chu tarik ni 17 December, 2011 inrinnizan a Kohran tawngtai inkhawmnaah a nih. Hi zan hin, kohran lai ka hang puong chun a mi lo in hnikpui le inhnikpui lem lova nuizata la pawl khawm an um bawk. Tawngtai ruolna kan neizo, inkhawm tin chun kan D.S. (District Superintendent) pa chun i thil tumhai lo en ka ta, zingah Counseling ang deu la nei ei tih, a mi ti a.
A zing, inkhawm tin chun D.S. pa le chun kan titi tlang a, ama chun MLA in candidate ding chun laibunghai ko khawmin, ran thatin, i thil tumhai puongzar ita, chun Election Office-hai hawng ngai ata, tiin, ka sum nei zathai a min dawna, chu khelah election a ka ngir ding hi, ka puongzar inhnu taluo thu le tawngtai inkhawmna ah ‘MLA kan candidate ding thu hi, scrutiny ka fethleng hma khat chu mi laia puong dar lo dinga ka ti khawm kha’, a thaw dan ding a ni nawh tiin ami hrila. Chuongchun, kan titi zo chun bus-a ka chuonga, intieng ka tin tah a.
Kum 2012 Election Campaign
 Bus-a khawm chun ka hang inngaituoa ka bei a dawnga, Lalpa i mi hrietchiengnaw lei amanih aw? Ka ti rum ruma, ka mitthli, ka bula ngir le thunghaiin hmu pal an tih, ti kan lau bawk. Zinah, ka hang zal khawm chun ka bei a dawnga, kei le kei ka hang inen a, thaw danding ka hriet si nawh, “hi thila hin chu Pastorhai amanih, an nawleh mi fel le var an tam vei leh, Lalpa kei kher kher, iengkhawmlo, Chawkchawnal khawm tluk hi”, tiin. A thal a, ka zal chun ka mitthli khingtieng khingtieng afar zung zung el si, ka suongha’n hre pal an tih, ti kan lau bawk. Chuonga, beidawng tak a ka tap lai chun, keimaah thu hungthlung chu, “kei iengkhawmlo, Chawkchawnal khawm tluklo pa hi, Van Lalnau thisena an tlansa ka ni a, Lalpa Hnuoi le Van siemtu mithmua hin ka hlu a, Hmarram le Hnam tading khawm hin ka hlu anih,” ti, a mi hung inhriettir chun, inhawi deuvin ka in thei tah a nih.
Chun, Tipaimukh biela MLA kan candidate ding a nih, ti tlangzarna hmasatak chu Kristmas zo 27 December, 2011 khan Parbung khuoah, ka nute naupa, Lalkhawthang-in khawtlang thuoitu thenkhathai ko khawmin nei ani a, mi tam tak ngai a chun mani nina hre lo, invet ka lo nih. Amiruokchu, Pathienin rem ati chun invet chau nilovin thi chenin kan huom a nih.
December ni 29, 2011 chun, Aizawla inthawkin sumdawng motor-in Churachandpur ka pan a. Kumthar lawm zovin January ni 3 ainthawkin DC Office ka dawr tana, mihai chu motor leh ropui deuva an inthawk laiin, kea, ka hang inlawn vel chu, ka nui chu an za ve deu hlak a chu, kan nui suok lem naw a. Thawdan tharin, MLA in candidate-hai po povin Election Expenditure hrietna dingin Bank Account thar hawng a ngai leiin, Bank Account hawng dingin nihni lai ka buoipui a, iengtin am aw!, a mi introduce tuding, ti a ka ngaituo laiin putar pakhat hi a hung a, Bank Account ka hawngna dingah introducer-ah ahung thang a, a mi thawpek hnung chun ka hang indawn chieng chun, chu putar chu pastor a  lo ni zing chutie!
Churachandpur ka tlung hlimin, ka sunghai kuomah MLA kan candidate ding thu le ka ngir tumna san – “tawngtai ei ta, ei ram, ei hnam hriechiengtu le hmangaitu Lal Isu leh vote thlak ei tiu”, tia khek pui ka tum thuhai ka hrila, ka suonghai chun, “ei ram ei hnam chu a sie ta ngei an nawm, kohran thuoitu ha’n theitawpa an hril khawmin tangkai chuong lo, nangin i hrilin umzie um chuong naw nih”, ti’n anmi dawn a. Ka sung-le-kuohai le chun kan hmu dan an ang naw hle a. MLA in candidate lo dingin theitawp in an mi hril a, ka Pate-hai damin an mi kova, hienglaihin, keima ah Pathien thu hung inlang chu- David khawm apa Beram a venglai khan, a uhai raldonaah, apa’n chanchin hre dinga a tir khan Philistine-hai le Israel-hai indona hmun a va tlung khan Philistine mihrat, Goliatha’n Israel-hai a chodei a hmu khan, ama a Pathien thlarau a hung tlung a, “khawm keiin, ‘sertanlo, Sipaihai Lalpa hung cho tuchu’, vabei ka tih”, a ti a, khanglai khan Pathien vantirkovin, “nang David fe la Goliatha kha va that rawh”, ti sienlachu, David unauhai khan David kha inzapui nawni hai, amiruokchu, Savawm le Sakeihai a inthawka humtu chu David khan a hrietchieng anih. Kei khawm Pathienin rem a ti ani phawt chun a remna tieng tieng ngha’ng ka ta, ka hril ngai chu ka hril el ding anih, ti hi ka thu thlukna chu anih.
Unau, laibung tam takin an mi zilhau laia ka dawnna chu- “Laibung le inzawmin mi vote naw unla, ka pasiet lei le in mi lunginsiet leiin mi vote bawk naw unla, ram le hnam hi Laibung le inzawm a thaw chi annawh a, MLA candidate-hai po po neka, ei ram le ei hnam hrechieng lemtu le hmangai lemtu, Lal Isu neituhai ei ni a, tawngtai ei ta, Lal Isu leh vote thlak ei tiu” ti hi ka dawndan anih.
Pathienin rem a tia, ei ram le ei hnam tadinga rawngbawl dinga Ami ti a ni chun, thiltum (manifesto) panga ka nei a, chuonghai chu-
  1. A pakhatna le a pawimaw tak chu Pathien ta ding a ringum.  Ei ram ei hnam hieng em ema ei thlak siet le mi hnung hnawta ei umna sanchu Pathien tadinga ei ringum naw lei ni’n ka hriet. Mihriem mithmuah ringum ei tum a, tienlaia Israel-hai Lal, Sawla ngei khawm kha Pathienin an hmelhmahai that chimit der ding a tirlai khan, Pathien thu zawm lovin, mipuihai a ti leiin, an hmelmahai lalpa, Agag le ran chawmthau tha thahai a hung hawn khan, hnawlin a um pha anih. Vawsunhin, Pathien tading a ringum lova ei um leiin ei ram hi a pasie a, mihai hnung ei hnawt anih.
  2. A pahnina a ka hung ngai pawimaw chu ei ram, ei hnam thlusie ta hnung tungding nawkna ding chun inngaithlawm tak a Pathien kuomah tawngrai hi anih. Tawngtai ti hin chapo tak khawmin ei tawngtai thei anih. Ei Lalpa Isu ngeiin a lo hril tah, Pharisai le Siedawltu tawngtaina a khan ei hmu thei. Pharisai pa khan chu a tawngtaina a khan a thilthawthathai, a sawmapakhat pekhai, a bungheihai an zawt ani kha, amiruokchu thiem a changchuong le. Siedawltu pa ruok khan chu, suong dinga neinawh a Pathien hmabula khan, Lalpa misuol ka nih tiin, a awm inchum in vantieng khawm ngha ngam lovin a tawngtai anih kha. Mani suolna hrie a Pathien kuom tieng a kirhai chu thiem changin an um anih. Ei ram, ei hnam damna ding hin inngaithlawm taka Pathien kuoma tawngtai ei tul a nih.
  3. Mipui sum (development Fund) rengreng chengkhat khawm lak peng lo le a dawng tu dinghai kut a him tak a inhlan le a hmangna ding tak a hmang. Pathienin rem a tia, ram le hnam tadinga rawngbawl dinga ami buotsai a ni chun ka biel suonga sum le pai alut le suok hi hriet chip chier ka tum anih. Ka biel sung a contract le sanction reng reng ieng ang in am sin an thaw a- hlawfa ruoina’n sum ieng zam an seng? Ieng thing le thir am an hmang? A sin thawtu ha’n ieng zam a hlawk an hmu? Ti le a dang danghai hi ka hriet chieng ding annih.
  4. Lamlien ( Road) tha nei. Mipui han ei lo hma suok / kut suok thilhai a hlawk dan ding tak a ei zawr suok theina ding le kawng dang danga hma ei sawn hrat theina dingin.
Tuta, achung ei tarlang Pathumna le Palina-hai hi a pawi maw em em, hieng ei tarlanghai hi ei nei theina dinga pawimaw tak chu, a Pakhatna ei tarlang Pathien tadinga ringum ti bawk hi anih. Pathien tadingin ei ringum chun indiklo takin mipui sum faru ngainaw’ng ei ta, Pathien tadinga ei ringum chun, ei mamaw em em Lamlien tha chu nei em em ei tih, ei Pathienthu chun “in rama thilthahai f]ng intih,” ti ani si a. Ei rama thiltha a suok thei nawna chu lamlien tha ei neinaw lei khawm hi ni’n ka hriet, ei nauhai tam tak chu mi ramah inhlaw in an um a, ei ram leilung le thing le ruo hausakna khawm ei fak theinaw ani hi, hieng po po hi a san lientak chu Pathien tading a ei ringum naw lei a nih.
  1. Ei hnam, Hmar hnam chimral (assimilate) ei ni nawna dinga thei tawp suoa Tipaimukh Dam dodal.
Tipaimukh Dam an siem kar nghakhla le zangnadawmna (compensation) lak vat vat nghakhla a, Dam an siem zo ph]t chu sawrkarin mi ngaisak a ta, lamlien (road) tha tawk tak hung siem a ta, ei ram ah inhlawna tha’ng a ta, ei thaw suokhai khawm a zawrna ding awlsam tang a ta, sawrkarin khawpui hung siem a ta, ei nauhai ram hla tak tak a sie ngailovin, ei ram ngei a school tha a kai tang an ta, hotelhai siemin inhawi deuin khawsa’ng ei ta, lawnga intawlin ngahai manin, khuolzin hip ning eita, meivar dittawk atlawnin hmung eita, ei ram, ei khawlaidung chu zan a khawm, sunlai ang elin, ung ter tur a ta, thilsiemsuokna khawllien tak takhai electric tha hratna ringsanin siem eita, ei ram chu vanram thlafuol, kan Sinlung khawpui chulhnung indintharnawk hung ning a tih, ti tu hai Zinga chun ieng am ahung tlung ding ti inhriet si naw a?
Dam in a hung hring suok ding changkangnahai po po hi an dik hle’n ka hriet, amiruokchu, hi thil a hin chu ei fimkhur hle a ngai. Tipaimukh dam leia Meitei le Vai tam tak ei ram ahin an hung lut phat, Hmar Hnam angin ngir suokna ding ei nei ding a manih ti hi, ei in sutchieng a ngai anih. Tuta, Tipaimukh Dam hi chu Mega watt 1500 lai pesuok thei ding a ni a, hi le inzawm hin Bangladesh a Kaptai Dam zuk hril kai vak ei tih. Kaptai Dam hi Mega watt 230 lai pesuok thei ani a, hi Dam hi an bawllai chun a ram deltu Chakma-hai chun ieng a khawm an bengkhawn rak naw ni awm tak anih, amiruokchu, Dam a hung puitling meu chun, Bangladesh sawrkarin a bul hnaia an khawsak a hung phal tanaw a, chuongchun Chakma mipui nuoikhat nek a tamin an chengna an suok san pha nih, mi tamtak Burma-ah an tlanluta, a then India ram state hran hranah an in vak dara, chun Arunachal Pradesh-a lem chun a ram mihai leh an buoi rawp hlak anih. Chakma mipui tamtak chu an piengna / seilienna, an rama ngeiah mivakvai / mi chavei an hung ni tah, anih. Vawisun hin Hmarnauhai hi ei \hanghar a, ei hmatieng ei thlir ngun ahun tak zet an tah, Kaptai Dam megawatt 230 le Tipaimukh Dam megawatt 1500 leh ei hang tekhi chun a kar hla tak anih. Ei Hnam, Hmar Hnam Chanchintha Mansapui inbangna intihai hi iemana ei thaw ding, Pastor Thangngur-in ‘Tuta kum za hnungtieng khawlam um I ta? tia, hla a a lo inzawt kha, tuta inthawka kumza hnungtieng, Chanchintha kum zahni tlingna (Gospel Bi-Centenary) ei lawm hun a meu chun Hmarhaiin, Hmarram tia ei kona hmun a hin Hmarnauhai hi Hmar ei la nizing ding am? Gospel Chanchin\ha hi ahran a hril ei ngai nawk el di’m, ti hi ei ngaituo a tul tak zet a nih.
Mi ei hrilsietna ni lovin, Peinawr (Labour), lamlien siema hung inhla fa hai khawm ei nau nuhmeiha’n an en thei naw a na, hi lei hin hmun tamtak achun Vai-Pi le Vai-pu ei tam taluo tah, Tipaimukh Dam a hung puitling chun Vai le Meitei hnawkawr a inthawk a Officer lien tak tak chen an hung um awm sia, Vai-Pi le Vai-Pu chu ei va tam nasa zuol awm de!! Ei Hnam hi thangkhat, thang hni-ah chimral in ei um el naw ding maw? “Mi tam tak chun, Tipaimukh Dam hi dodal rak inlakhawm sawrkarin hung siem tho atih, ei dodalin umzie um chuongnaw nih,” ei ti a, hi thil a hin chu ei dodal in umzie um tak meu a tih, ti hi hrieng ei tiu. Hmarhai hi a ram neitu ei ni a, ei inthuruol phawt chun, ei dikna, chanvo (rights) hi UNO le India sawrkar khawmin min za pek reng reng a tih. A hrim hrimah, dodal le dodallo kar chu akar hla tak anih, vawisunhin dodal \hak lovin Dam hi lo hung puitling tasien, ei chan ding chu Compansate tlawte chau bak ni naw nih, chu khawmchu kum khat, kum hni sungin ei chenral awm si. Dam hi ei thei tawpa ei dodal a sawrkarin a hung siem a nikhawmin, ei hnam ta dinga innghatna thlak iemanih bek chu ei hmu thei ngei ring a um. Chuleiin, ei Hnam damna di’n ei thei tawp in Tipaimukh Dam hi dodal phawt el ei tiu.
Unauhai, vawisuna ei hnam ngirhmun hi ei thlir chun lungawi a um naw anih. Chanchintha mansapui inbangna hnam ei inti si, hieng lawm lawm a ei inthe dar hi, state hran hranah the darin ei um bakah, pawl hran hranin ei inthe dar nawk a, ei hnam santu tia ei ko, ei Tlangvalhai hlak hi pawlthum in ei inthe dar nawka. Manipurah khawm hin MLA 3 bek ei neithei awm vei leh, ei hmasiel lei le abul ei tan indiknaw leiin MLA pakhat chau ei neithei a na, hi khawm hi Tipaimukh Dam a hung puitling phat chu Vaihaiin an mi la lak pek el naw ding maw? Ei Pathien thu’n “I rawngbawl nuomna hnam le ram chu a boral awm sih a,” (Isai 60:12) a ti hi, eini Hmarnauhai hin ei hmasawn mek ani naw maw? Vawisun hin iengtin am thaw tâng ei ta?  Ei ram, ei hnam sana di’n chengrang chawiin doral ei rel ding am anih? Ei ralthuom diktak Gospel Chanchin\ha sirah ei hnawl leia tlusie mek ei ninaw maw? Unauhai vawisun hin Lalpa kuomah kirnawk ei tiu. Hi le inzawm hin, tuhin ei rengin lo ngir eitiuva, “Tien inthawk Chanchintha ei dawng, hmangaina le in remna in ro ei rela,” ti hla sak ruol ei tiuva, chu zovah tawngtai ruolna ei nei ding anih. Ei tawngtaina chun, ei ram, ei hnam tlusie mek tading le ei hmaa MLA inthlangna a Candidate po pohai le mipuihaiin Lal Isu leh Vote ei thlak theina di’n ngen ei tiu. 

1 comment:

  1. Manifesto a tha ie. 'Lal ISU le vote thlak' ti hi a ropui ngawt el. Ei vote thlâk anthawk ei sukdiknaw rawp hlak leiin a result/MLA khawm ei thlang fuok thei naw chu ni tak. Indikna Lal Hnawl chelin hung tling hung tling ngei rawh.

    ReplyDelete