Vision: HUNGRO, INDIN THAR NAWK EI TIU

HUNGRO, INDIN THAR NAWK EI TIU


Khuonu thiltlawn pék hmangaina leiin mi tam takin hlimna le lawmna an chén laiin, ṭhenkhat ta ding chun harsatna le beidawngna khurah a hnuk luttu a ni rawp hlak. Hmangaina ti hin Nunghak-tlangval kar a hmangaina, Nupa kara hmangaina, Pathien le mihriem kar a hmangaina, ram le hnam hmangaina le adang tamtak khawm hril ding um a tih. Hi lai a, ei hril nuom tak chu Ram le Hnam  Hmangaina hi a ni a. Ei Ram, ei Hnam, ei hmangai ém ém hi iengtinam indinthar nawk ei ta? Hmangaina indiktak leh, ei Ram, ei Hnam hi ei indinthar nawk ding a nih.
“Hringnun lamtluong damte a i hrawlaiin, kan sakruong le tlunglu chu in zinga dingin kan inhlan anih ti mi lo inghil pek naw ro” tiin, Khawvel Indopui Pahnina lai a, ram le hnam san a hringna hlutak lo inhlan tahai Tlanlung ‘Kohima War Cemetery’ a chun an ziek (When you go home, tell them of us and say that for your tomorrow we gave our today). Ei ram ei hnam indintharna ding le ṭhangtharhai ta dinga hrietzing tlak ei ni theina ding chun ieng am inhlan ding ei nei ve a?
Vawisun a dam a la umhai hin, Hmar nau ṭhang-le-thar la hung um pei haiin hlim zai an vawr theina ding chun inhlan ding tam tak nei ei tih. Chuonghai lai a, ei inhlan ding, bansan ding pawimaw tak ni a ka hriet chu “Election lai a thamna pawisa in pek, thamna pawisa lak, silai chawi a inrik rap, mi rethei le pasie chan-ai fakruk le Pathien ditnaw zawng thil suolthaw” hai hi annih.  Unau, vawisun hin ei sakruong, tlunglu hi, iengtinam ei inhlan ding? Iengtin am, ṭhangtharhaiin ei Lungdaw an hung tiem ding? |hangtharhai ngaisang thlak a sulhnung maksan seng dingin Ram le Hnam hmangaituhai ei inngen tak zet a nih.
Vawisun hin ei hnam Political Movement leiin, ṭhalai tam takin tlunglu an inhlan tah a, ngaisang an umin chawimawi an phu ngawi ngawi. Nang le kei, dama la um hai hin, ei ram le hnam tadingin ieng am inhlan in, pe ve ta’ng ei ta? Ei ram, ei hnam indinthar nawkna ding hin, iengtin am, kal ei pen ding?
Ei ram, ei hnam indinthar nawktu ding chu, unau, tu mi dang ni lovin, nang le kei ngéi hi ei nih. Nehemia chun a thlatuhai suolna chu ama liengko a innghatin, Van Pathien, iengkim thawthei hma ah thuphachawiin a ṭawngṭai a ni kha. Vawisun hin, ei hnam bawsietnahai hi, mi dang intum lovin Pathien hmaah inngai tlawm takin, ṭawngṭaiin suol thupha, ei chawi a ṭul ta tak zet anih. 2 chronicles 7:14-ah Pathien thutiem, ei hmu angin, Pathien kuomah ei suolnahai nghatsana, thuphachawia ei ṭawngṭai chun, Pathienin Van a inthawkin hrieng a ta, ei ram khawm suk dam bawk a tih.
            Vawisun hin, unauhai, kei Ngurrivung hi, ei Ram, ei Hnam indinthar nawkna ding a, “Hung ro, Indinthar nawk ei tiu” ti a hma hang la ding hin, tu am ka ni bik a? Mithiem, mivar, mifel le sakhuo rawngbawltu tam tak hai lai hin, kei te lul hi, ei ram le hnam indinthar nawkna ding a hmalatu hang ni chu, insit hi a na khawp el. Ei ram Politics fe phung hang siem ṭha ding hin, tawnghriet (experience) khawm ka la nei nawh a, pumruo le hmel a khawm ka tlawm rawng rawng in ka hriet. Ei ṭhuoituhai le Politician hlunhai hieng Pu Chaltawnlien Amo, MLA nilai zing, Pu Ngursanglur, Pu Selkai Hrangchal, Pu Lallukhum Fimate le mi dang dang hai leh ka hang in tikhi lem hin chu, ka tlawm rawng rawng in ka hriet el a nih. Amiruokchu, Ngurrivung hi, ieng ni naw lang khawm “a mi suk hrattu Krista Isu a chun iengkim ka thaw thei a nih” ka ti ngam ve a nih. Krista thisen hlu taka intlansa ka ni a, “m`n an thawthei chun keikhawmin ka thawthei a nih,” ti hi, ka ring tlat a nih.
Ram le hnam ṭhuoitu tam tak hai hi chu Lal sungkuo a inthawk a seilien dam, mi hausa sungkuo a inthawka seilien dam an nih a. Amiruokchu ram le hnam ṭhuoitu ropui tak tak hai hi mi hausa le Lal sungkuo a sei lien anni vawng chuong nawh. Entirnan, Abraham Lincoln hai dam, George Washing hai dam, Narendra Modi hai dam le ei Lalpa, Isu Krista ngei khawm insung rethei tak a inthawka seilienin, Van khuo-le-tui nina chen min tluntu  anih. Barak Obama hman hi, mi dum (Negro) an hmusit ém ém na ram, USA ah President a hung ni thei a nih, Abraham Lincoln khawm School kai mumal lo, a tawp ah USA President hung niin Saltang insuotu ropui tak a hung ni thei a nih. Chun India Prime Minister, Narendra Modi khawm hi a naupang lai chun Rel Station vel a thingpui zawr ve mei mei niin Prime Minister a hung ni thei bawk a nih.
Vawisun hin, Ngurrivung hi, ka thiltuma hin ka chieng a, ka thiltum hlen suokna ding hin Pathien in keima ah hratna le theina ami pek a nih, ti hi ka hrietchieng ém ém a nih. Unau dittakhai, ei ram, ei hnam sum-le-pai fakrukna suol a tlusie mek hi “Pathien le ei Hnam ta dingin” tiin, Hungro Indinthar Nawk Ei Tiu.