Ngurrivung Chanchin

By - Tv. Ngurrivung

Ka Naupang Lai Le Lekha Inchuk Hun Tlangpui


Kan naupanglai chun Khawthar zawlah “Siem ang siem ta rawng e”(Thiem ang sir ta rawng e), tiin zakuo le kekawr bovin, kan kut kan phar a, kan kawng kan nam a, kan khup kan suk a, Hmar lam thaw in, kan lam kuol ve dap dam hlak. Ka Pa Do (Famtah Ngamhrangdo) chun Duli in ti thei chun peng ka ti cheu a ti hlak a. Kei chun, theitawp suoin, ti ka hang tum khawmin “Du-`” ka ti hlak a, Darpuivung ve thung chun “Dur`” a ti ve thung a, Duli kan ti theinaw leiin, nitin tinin, Duli chu kan chan zie el hlak anih.
    Ka Pa hming chu Ngurkhawsiem a ni a, Siema tiin an ko hlak a, chun ka Nu hming chu Ngurkhawlkim a ni a, Khawlpui tiin an ko hlak. Kei hi an nau pathum hai lai a naupang tak le an naupasal neisum ka ni a, Parbung khuo a pieng ka nih. Ka Pa mi hril dan chun Kangsat neikum a pieng ka ni a, chuchu, kum 1981 kha a nih. Ka pieng ni-le-thla hi hrietchieng a ni naw a, ka nute hai hril dan chun Good Friday lai vel a ni a, chuchu, April thla vel a nih. Pawlsawm ka Examna dinga u Joel-in Form an mi lo fill up pekna a ruokchu 10.04.1983 a ni ve thung.
Ka nu-le-pahai hi ziek le tiem an thiem nawh a, ka pa hin a hming hi hawrawppuiin kawtkharah a hawrawp letling dam in ahming a ziek ka hmu zeu zeu hlak. Ka pa hin ziek le tiem thiem naw sienkhawm inchukna hi chu a ngai pawimaw hle’n ka hriet. Lekha ka tiemna ding kherseu mu dam a mi hung hawn pek hlak a, chu bakah zingkar lekha ka tiem changhin ama’n tlai a suong a, a tlaisuong, a hmin hnungin milova inhlawna ding dam a la hang zawng hlak anih.
Ka Pa hi, kum 60 a pel hnung, ka lekha inchukna ding leia kan veng ka suoksan ding khawmin, mi ngai hle sienkhawm a mi sel ngam naw anih. Bible kan inchuklai le BA kan inchuklai hin, dam nawna leia khum chungah a makhat chauva, mi ngai em ema a hun iemani chen a hmang hai dam kha, ka ngaituo kir chang hin, ka Pa hi ka hmangai ngawi ngawi hlak.  Ka hmangai em em ka Pa chun tarik 27, March, 2006 khan BA II Year ka Exam laiin Chatuonram a mi lo inlawi san tah a nih.
Ka Pa hin a lungvarah mihai phak lovin inlang sienkhawm, Ram le Hnam a hmangaina, Hmar hnam ta dinga an pekna hi, kei chun ka khum thei ka ring nawh. Kum 1960-61 lai a, ei unau Thado-hai leh unau-hmel-hai thawa ei buoi lai khawmkhan ka pa khawm ral hmatawng ah a thang ve a, hliempui a tuor ve hiel anih, hliem a tuok hnunga zawn an tum khawmin, Hmarpasaltha tiin ke in a la lawn ve tal tal a nih.
    Ka Nu hi ana a s’et a, a naset leiin harsatna tam tak a tuok hlak.  Amiruokchu, ieng ang harsatna khawm tuok sienla Pathien zarin a hlim thei em em a nih. Mi’n thil an pek reng reng hin Pathien kuomah lawmthu hrila a tawngtai hmasa phawtnaw chun, a lak in, a fak ngai nawh. Kum 3 mi ka ni chauvin, ka Nu hmelhmang khawm kan chik thei hma, kum 1984 khan ka Nu chun Van Jerusalem tharah, a mi lovin lawi san tah a nih. Amiruokchu ka Nu mi hmangaina hi ka hringnun a pawimaw tak pakhat a nih. Ka Nu hin a mi dam sawtpui naw vieu a chu, ka tading hin thil ropui tak a thaw a nih. Ka Nu tawngtaina le Pathien tadinga an pekna hi vawisunni chena ka hringnun keihruoitu tak ni’n ka hriet. Ka nautet laia ami lawm dan, mi tamtak tading a fiemthu nuizat ah lo inchang hlak sienkhawm, iengtik ni amanih chu Pathienin a tak ram ah, lan changtir ngei a tih, ti ka ring tlat anih.
Ka Nu thi hnung chun, kan khuo, Parbung a inthawkin kum 1986 le 1987 sung khan Parvachawm ah ka Papui hai kuomah, ka Pa rawiin kan hang uma. Ka Pa hi Pavachawm a pieng ani a, ka Pi phingsungah aum lai hin ka Pu chun a thisan a, hun iemani chen hnung ah ka Pi chun ka Pahai u-reng chu Lungthulien tieng, a Pa-hai intieng a fe pui a, ka Pa-hai chu naupang chi te te an la ni a, lam kar lakah riek a ngai a, hieng lam kar laka an riekna le an fena a hai hin sakeiin a veng pei thu ka Pa le ka Papui ha’n an mi hril hlak. Lungthulien a chun ka Pahai chu a Puhai (ka Pi Nu le Pa hai) kuomah an khawsa a, tlawma an hung lien met hnung chun ka Pi chu a nu le pa ha’n Peite ramah pasal dang an innei tir, ka Pa chun mittli huoi pumin khawsawt takin Lungthulien khawchung a inthawk chun Peite ram, a nu pasal neina tieng chun a tlir vawng vawng hlak a nih.
Hun a hung liem pei a, ka Pa chu a vawikhat tleirawl chun Peite ramah, a nu pasal neina khuoah a hang inzin a, a nu chun a lo hriet ta nawh a, mikhuol tiin inah khawm a lo inluttir nuom nawh a, nisienkhawm ka Pa chun inthlahrung tak pumin a chanchin a hang hril chun ka Pi chun tap pumin a kuo a, zarluong a an mawt sie that hai chu a hung phawr a, fak ding inhik an nei ang ang chu inro lovin a hung phawr suok ta a nih. Tuhin, ka Pi nauhai, a tu-le-tehai hi Sinzawl lai khin sungkuo iemani zat an um a nih. Ka Pa hringnun hi ka ngaituo chang chun ka hnukin a mi ul a, um dan tawk hi thiem harsa ka ti hlak. Ka nuhmei nei kar nghakhla taka, a mo le a tu-le-te hai hmu kar nghak hla em em a tlir laiin, a khawvel rinum suoksana, chungtieng a mi lovin lawisanna a hin rinum ka tina a zuol a, “iemata aw! lekha inchukin khaw dangah ka pa kha ka thang bosan”, ti’n kan ngaituo hlak. Amiruokchu, vawisuna dam a la um, Nu-le-Pa ditum tak tak hai rawngbawl thei dinga Pathienin ka hringna derthawng tak a mi la hla pek hi ka lawmna ropui tak a nih!
Kum 1989 khan, kum chanve vel Mana Full Gospel Church haiin Children Home an siem ah, Pu Thoma enkawlna hnuoi ah, Rengkai Road, Churachandpur ah  A, B, C. Hawrawp pui le hawrawp te ka hang thiem ve a. Kum 1990 khan Reform Presbyterian Church School (Jubilee Standard School) Parbung ah Nursery-B a inthawk kan chuk tan a, 1995 in pawlli ka thaw a, a kum nawk 1996 hin pawl 5 baw-kan in pawl 6 kan chuk a. Kum 1997 ah Rengkai Government School ah pawl 7 kan chuk nawk a. Kum 1998 a inthawk a kum 2001 sung ruok hin chu insung tieng sinthaw a ngai leiin Lo sin thaw’n ka um a. Kum 1998 kum hin ka school kaina hlak Jubilee Standard School a hin Principal, Pu Gouzahau-in, School kailovin Exam a mi phal pek leiin lo sinthaw pumin lekha ka tiem a, kum tawp exam ah First Division ah ka pass phak ve chu tie! Hi kum hi, Tuibum hnar tieng neikum a ni a, Paiva kapah lo kan nei a, buthak pum dam in lekha ka tiem hlak. Hienga buthak puma, lekha ka tiem hi min mi hmu’ng an tih, ti kan zak deu leiin, mi ka hmu phat chu inhmaw deuvin ka lekhabu chu ka thup vat hlak.
Kum 1998 le 1999 kum hai hin mi lova inhlaw a fak fawm zawng le mani lohma sinthawin theitawp ka suo hlak a. Kum 2000 le 2001 a hai hin chu mi lova fak fawm zawnga inhlaw ngai talovin a kum hmasaa ka thlosuokhai ringin mani sin thatak in ka thaw thei tah a nih. Hieng a tlanglo neia sin ka thaw lai hin tui phur, thing phur, nuhmei pasal sin ti bik umlovin ka thaw sa vawng a nih. Kum 1998 le 1999 kum hai a lem hin chu mi lova kan hlaw nasa bawk leiin zantieng nisa thlak hnungin Situi ah tui insil malam in belin tui ka zun chuon deu zie hlak a nih.
Kum 2001 hin National Open School ah pawl 10 ka exam a, bukhat ka failed, a kum nawk 2002 a hin ka pass ve hram. Kum 2002 a inthawk a kum 2004 sung hin Nazareth Bible College, Nehru Marg, Rengkai, Churachandpur ah B.Th.( Bachelor of Theology) kan chuk a. Bible inchuka fe ding a kan siem kum hin pawisa ka nei ang ang kan khawl a, Lo tin hni le a chenve hmun vel ka vata, lo raw zovin hmang ka khaw zo hieuva, ka Bible inchuk tum, a rem chang naw thut khawm in, lo hma ah mi hnung hnawt lovin ka pu chat theina dingin, tiin. Hi kum hin mithen khat ngai a chun invet ka hlaw kher el, ka lo chu, Pu Hminga kuomah, kum tawpah bu tin 15 vel ka pa kuomah pek dingin ka zawr tawp el a nih. Hi kum hin ka lohma hi keiin enkawl lang chu kan kumhni fak nek a tam bu kan nei ding a nih. Chun, hi kum hin kan vawktehai a tlang a mi kan in vai tirhhai chu vangduoi thlak takin an lo thi nawk a.
Bible inchuk a kum hnina a hin, ka Pa chu thi hmunsuolin a dam nawa, ka Ni le ka Rang ha’n an mi hung incha a chu, thaw danding av]ng khawpel, amiruokchu Pathien zarchauvin ka Pa chu a hung thasuok nawk a, kei khawmin kan chukna chu ka sunzawm nawk thei a nih.
Kum 2004 hin pawl 12, National Open School ah ka pass a. Ka B.Th inchuk chu Graduate hman talovin, B.A. inchuk dingin Aizawl tieng ka fe san tah a nih. Aizawlah  college kai zawmna ding rem chang ka hmu naw khawmin ka Bible inchukna hi sunzawm nawk thei dinga ka maksan a nih.
Kum 2004 a inthawk a 2007 hin B.A. kan chuk a. Churachandpur a inthawk Aizawl tieng B.A.inchuk dinga ka fe hin, ka motor chuong man bak cheng 30 chau ka nei a nih. Lampui ah bu fakna a khawm, “I ph`ng atam am?” an mi ti khawmin, “A tam nawh,” tiin khel ka hril top el a nih. Aizawl kan tlung chun Pathienni tuk a ni a, ruo a sur hmer hmer a, sum a zing chuk bawk a, ka fe nading bik khawm ka hriet nawh, ka motor chuongpui, pa pakhat (a hnung a ka hriet dan chun Pu Rothuom), chun “khawlam i tum ding?” tia a min dawn chun, “motor tlan tawpna na ah,” ti’n ka dawn a. “Iem i thaw ding?” tia, a min dawn nawk chun, “lekha inchuk ding ka nih,” tiin ka dawn a. Ka vawikhat fena  a ni  bawk, hmel hriet ka nei naw bawk leiin, a sanghai (U Darrosanghai) kuom tieng innghat dinga ami fielna chu, ieng hril rak lo chun ka zui ta a, taxi kan chuongna khawm chu a ma’n chuongman (fare) a pek pei a, hang pe ve ding nilang khawm ka neiin kawi, khat kawi hni bak chu a dei nawh. Ka hausa naw a chu Pathien zarin ka muolpho nawh.
Chawlkar khat vel, u Darrosang-hai in, Durtlang, Aizawl ah ka um a. Hi sung hin sinthawna ding ka zawng a. Rangvamuol tieng Pi Zovi Hmar, Parbung khawsuok, ka pu Tuoka-hai le inhnai deu an um leiin ka zu zawnga, sienkhawm ka beisei ang a lo ni nawh a. Pu Rothuomin Rangvamuol tieng ka fe a lo hriet chun Bible inchuk ka nih, ka ti chu a awi naw rak a nih. Asanchu, Rangvamuol hi zu tamna hmun ani leiin. Durtlang tieng chun ka kir nawk a, chu zo chun Lengpui tieng u Sawma hai an um ti ka hriet leiin inhlawna ding zawng ah fe ka tum nawk a, tlung zo lovin Sairang lai Thing workshop neitu hai kuom ah ka riek a, a zing a chun ke in Durtlang, Aizawl tieng ka kir nawk a. Hieng a sinthaw ding remchang ka zawng lai hin chu lamlien siemtu labour-hai (Peinawrhai) khawm hi kan hnar ngawi ngawi in ka hriet chu tie! Chun hi kum hi pa pakhat, Burma tieng suok in Aizawl ah School naupang a suolluia a that leiin, Burma tieng mi an hnawtsuok lai kha ani a, Lusei tawng ka pei (thiemnaw) bawk, athenin hmusittakin, ‘Burma mi am a nih’ tiin an mi lo tawng khum a, a buoithlak ve khawp el. Karkhat vel chuong a ka um hnung chun, School pakhatah a tul ang ang a, naupang inchuktir, hmun phit le tui chawiin ka thangpui a, anni chun B.A. Admission an mi thaw pek a, Pathien zarin hieng chen hi ka hung ni thei tah a nih.
Kum 2005 a ka Pa damnaw tum a, ka pa ka ngai zie le ka mang a, ka hmu ngun zie kha! Ka hang ngaituo kir chang khawm hin lungriem in a mi tlak hlak. Hi kum hin, Pu L.H. Thanga-hai inah ka um a, inchungah ka khat chauvin ka riek a, zan a hin ka pa chu ka mangin ka lo hmu in, ka ngai taluo hi ka tapsuok hiel hlak a nih. Hieng hin kar iemna ni zat chu ka um a, atawp a chun ka Pa damnaw thu an mi hung hril a, hi tak a ka hang hriet hin chu ka mitthli a parawl kieng el anih. Hi tum hin, vengtieng ka Pa kuoma ka vasuok a, ka thei tawp a ka hang bawisawm thei le a fak ding, Thingfanghma phur a dam ka fe a, Paiva ruomah Ngavawk man a dam ka fe a, inhawi ka ti tak zat. Ka lekha inchuk ka Pa’n an rimpui zie- damnaw mangang tak a, mi ngai ngawi ngawia a um lai dam kha, ka ngaituo chang hin chu “iemana ka lekha inchukna san?”, tiin kei le kei kan zawt rum rum hlak. Hi kuma ka pa damnaw, ka mangin ka hmu nasa hle laiin, athi tawm hnai le a thi lai hin chu ka mangin ka hmu thak nawh chu tie! Ka lungrila, ka lo insungtuo dan chun B.A. ka zo phat ka Pa damlai ngei nuhmei nei ka ta, ka ti chu, BA Second Year ka exam lai chungtieng Jerusalem thar ah rinum, buoina, mangangna le tapna um ta nawna hmun ah thuoiin a lo um tah a nih.  
B.A. chu 2007 khan Second Division ah Pathien zarin ka passed ve a. M.A. chu kum 2007 a inthawk 2009 sung khan Political Science subject la in Mizoram University-ah kan chuk a. Pathien zarin M.A. hi za ah 57.13 (57.13 %) hmuin, second division a bawk ka pass ve a.  Tuhin, Pathien zarin LL.B (Dan tieng pang) kan chuk a, Pathien thangpuina zarin tha taka ka zo thei ngeina dingin Nu-le-Pa, U-le-nauhai thahnemngaitak a mi lo tawngtaipui seng dingin ka ngen tak meu cheu a nih.
Ka Bible inchuk sung le B.A., M.A. kan chuk sung hin ka mamaw le ka pa mamaw thawk suokna dingin theitawpin sin ka thaw hlak a. Cement chawk a inhlaw, thirse zawr, Hmeruo zawr, thuomhnaw (second hand) zawr le a tul dang dang ka thaw hlak. B.A. kan chuklai lem hin chu kan hotuhai kuom ah rengthei, zikhluom le incheina thil dang dang ka zawr hlak, kan hotunu, Miss Zohma-i lem chun a period tawp zat hin chu ‘commercial break’ a mi ti pek zie hlak. Hieng hin sinthaw lang khawm Pathien zarin inzakna ka nei ngai chuong nawh.
Mi angin ropui nawsienkhawm, Pathien zarin hieng chen chen kan chuk thei hi ropui ka ti tak zet a. Mi tam tak chun sum le pai tam tak senga an thaw khawmin hriselnawna lei le thil dang dang lei damin inchuk hlei thei lova an um laiin, kei chu Pathien in hriselna tha le huntha a mi pek leiin ka lawm tak zet, Lalpa chu inpakin um raw se!